نزیکەی 60 هەزار کەس لە کەرنەڤاڵی پارتی لە دهۆک ئامادەبوون

ئاڤا نیوز

 

یەکێک لە گەورەترین کەرنەڤاڵەکانی لیستی 190ی پارتی دیموکراتی کوردستان بە بەشداریی نزیکەی 60 هەزار کەس لە یاریگای نێودەوڵەتی دهۆک ڕێکخرا.

 

چیرۆکی سەرەکی: نێچیرڤان بارزانی و مەسرور بارزانی، جێگرانی سەرۆکی پارتی، دەست لەناو دەست و تەنانەت بە یەک شێوازازی جلوبەرگ لە کەرنەڤاڵەکەدا بەشداربوون، کەرنەڤاڵەکە تەواو جیاواز بوو، چونکە یەکەمجار بوو لەماوەی هەڵمەتی بانگەشەی خولی شەشەمی پەرلەمانی کوردستان هەردوو جێگرانی سەرۆک پێکەوە بەشداری تێدا بکەن.

 

ژمارەکان وادەڵێن: نزیکەی شەست هەزار کەس سێ کاتژمێر پێش دەستپێکی کەرنەڤاڵەکە، ستەیج و ناو گۆڕەپانی یاریگای دهۆکیان تەنیبوو، هەمووان چاوەڕێ بوون گوێ لە پەیامی پێکەوەیی نێچیرڤان بارزانی و مەسرور بارزانی بگرن.

زانیاریی زیاتر: دوای ماوەیەک چاوەڕوانی، هەردوو جێگران پێکەوە و بە یەک پەیام، تەنانەت بە یەک شێوازی دەرکەوتن و خۆگۆڕین هاتنە سەر ستەیج و سڵاویان کرد، دەیان هەزار ئامادەبوویان خرۆشاند. نێچیرڤان بارزانی وتی، لەگەڵ برای خۆم کاک مەسرور و سەرکردایەتی هاتووین پەیامی ڕێبازی بارزانی نوێ بکەینەوە.

لێدوانی فەرمی: نێچیرڤان بارزانی لە وتارەکەیدا ستایشی ڕۆڵی مەسرور بارزانی کرد لە سەرکردایەتیکردنی کابینەی نۆیەم و سەرکەوتنی، باسی لە دیدگای مەسرور بارزانیش وەک سەرۆکوەزیران بۆ چوار ساڵی ئایندە کرد و گوتی، دیدگاکەی دیدگای خۆشگوزەرانی و ئاوەدانییە.

لەلایەکی دیکەوە: مەسرور بارزانی لە دەستپێکی وتارەکەیدا بە هەمان ڕۆحیەتی برایانە سوپاسی نێچیرڤان بارزانی کرد و هیوای مانەوە و سەلامەتی بۆ خواست. لە وتارەکەشیدا جارێکی دیکە پەیامی دایەوە ئەوانەی دەڵێن دەیڕووخێنین، سێ جار لەسەر یەک و بە دەنگێکی دلێر گوتی: نەشێن و ناتوانن.