ئاڤا میدیا دەبێتە میوانی سەرەکیی کۆڕبەندی ساڵانەی سعوودیە بۆ ڕاگەیاندن

ئاڤا نیوز

کۆڕبەندی سعوودیە بۆ ڕاگەیاندن ساڵانە تاوتوێی نوێترین داهێنانە تەکنەلۆجییەکانی بواری میدیا و بەهێزکردنی ناوەڕۆک دەکات،  ئەمساڵ و لە ساڵانی داهاتووشدا ئاڤا میدیا میوانی سەرەکیی کۆڕبەندەکە دەبێت.

 وێنە گەورەکە: بە بەشداریی زیاتر لە 80 دەزگای میدیایی عەرەبی و جیهانی، کە ئاڤا میدیا یەکێکە لەوان، هەروەها 150 پسپۆڕی ڕاگەیاندن و زیاتر لە 25 کۆمپانیای گەورەی بواری ڕاگەیاندن کارەکانی کۆڕبەندی ئەمساڵی سعوودیە بۆ داهاتووی ڕاگەیاندن لە ڕیازی پاتەختی سعوودیە دەستیپێکرد و ساڵانەش کۆڕبەندەکە فراوانتر دەکرێت.

ئامانجە سەرەکییەکە: بەرپرسانی سعودیە نایانەوێت ڕیاز تەنیا پایتەختێکی سیاسی بێت، هەوڵدەدەن ئەو شارە ببێتە سەرچاوەی داهێنانەکان لە داهاتوودا، بەتایبەتی لە بواری میدیا و داهێنانە میدیاییەکان لە سەردەمی پێشکەوتنە تەکنەلۆجییەکان و ژیریی دەستکرددا.

ئەمەش بزانە: لە کۆڕبەندی ئەمساڵدا ئاڤا میدیا تاکە میدیای بانگهێشتکراوە لە هەرێمی کوردستانەوە و لە ساڵانی داهاتووشدا میوانی سەرەکیی کۆڕبەندەکە دەبێت.

لێدوانی فەرمی: سروە هەورامی، بەرپرسی پەیوەندییەکانی ئاڤا میدیا دەڵێت: "پێشوازییەکی گەرم لە ئاڤا میدیا دەکرێت وەک میدیایەکی کوردی پرۆفێشناڵ و لەسەر داوای بەرپرسانی کۆڕبەندەکە ئاڤا میدیا دەبێتە میوانی سەرەکیی کۆڕبەندەکە".

"بەهێز کامیل، بەڕێوەبەری ئاڤا میدیا لەگەڵ زۆربەی کۆمپانیا و دەزگا میدیاییەکان کۆبووەتەوە و هەموویان خوازیاری کاری هاوبەشن لەگەڵ ئاڤا، بەوپێیەی میدیایەکی کاریگەر، پرۆفێشناڵ و خێزانی دەبێت". سروە هەورامی ئەوەشی گوت.

 بۆچی گرنگە: لە کۆڕبەندی سعوودیە بۆ داهاتووی ڕاگەیاندن، گفتوگۆ دەکرێت لەبارەی گرنگترین داهێنانەکانی میدیا، بەشداریکردنی ئاڤا میدیا لەو کۆڕبەندە دەبێتە هۆی گواستنەوەی زانیارییەکان و ئەزموونکردنی لە میدیای کوردیدا.


باکگراوند: کۆڕبەندی سعوودیە بۆ ڕاگەیاند، سێ ساڵە بەردەوامە، جگە لە بابەتە میدیاییەکان کە تەوەری سەرەکین، لە پانێڵەکاندا بوار بۆ گفتوگۆی بابەتە سیاسی و کۆمەڵایەتییەکانیش دەڕەخسێنرێت.

د. عەبدولعەزیز ئەلخزێری، وەزیری پێشووی ڕۆشنبیری و ڕاگەیاندنی سعوودیە و بەهێز کامیل، بەڕێوەبەری ئاڤا میدیا

 

بەهێز کامیل، بەڕێوەبەری ئاڤا میدیا و شازادە عەبدولرەحمان بن مساعد ئال سعود

 

بەهێز کامیل، بەڕێوەبەری ئاڤا میدیا و سروە هەورامی، بەرپرسی پەیوەندییەکانی ئاڤا میدیا

 

سروە هەورامی، بەرپرسی پەیوەندییەکانی ئاڤا میدیا و غەسان شربل، سەرنووسەری ڕۆژنامەی شەرقولئەوسەت