کریستیانۆ ڕۆناڵدۆ لەگەڵ شاندی سعوودیە سەردانی ترەمپ دەکات

ئاڤا نیوز

لە میانی ئێوارەخوانێکدا کە دۆناڵد ترەمپ، سەرۆکی ئەمریکا بۆ شازادەی جێنشینی سعوودیە سازی کردبوو، دەرکەوتنی کریستیانۆ ڕۆناڵدۆ بووە جێگەی سەرنجی هەمووان. ئەمە یەکەمین سەردانی ئەستێرە پورتوگالییەکەیە بۆ ئەمریکا لە ساڵی 2016ـەوە و ترەمپ بە گەرمی پێشوازی لێکرد.

چیرۆکی سەرەکی: لە چوارچێوەی سەردانەکەیدا بۆ واشنتن، محەممەد بن سەلمان، شازادەی جێنشینی سعوودیە لەلایەن دۆناڵد ترەمپەوە میوانداری کرا. ئەوەی دیمەنەکەی جیاوازتر کردبوو، ئامادەبوونی کریستیانۆ ڕۆناڵدۆ، ئەستێرەی یانەی نەسری سعوودی بوو لەو ئێوارەخوانەدا.

لێدوانی فەرمی: لە میانی دانیشتنەکەدا و لەبەردەم ژمارەیەک لە میوانەکان، دۆناڵد ترەمپ ڕووی دەمی کردە ڕۆناڵدۆ و پێی گوت: "بارۆنی کوڕم هاندەرێکی سەرسەختی تۆیە، خۆشحاڵم کە تۆش لێرە ئامادەبووی، ئەوە شەرەفێکی گەورەیە بۆ من."

ئەوەی پێویستە بیزانیت: پێشتر بەرپرسێکی کۆشکی سپی ئاشکرای کردبوو کە ڕۆناڵدۆ بەشداری ئەو ئێوارەخوانە دەکات، بەڵام ڕوونی نەکردبووەوە کە ئایا ڕۆناڵدۆ وەک بەشێک لە شاندی فەرمی سعوودیە بەشداری دەکات بەهۆی یاریکردنی بۆ یانەیەکی ئەو وڵاتە، یان بە بانگهێشتێکی تایبەت و بە فۆرمێکی جیاواز ئامادە بووە.