لیستی مووچە بڵاودەکرێتەوە و مووچەی مانگی نۆ دابەش دەکرێت

ئاڤا نیوز

شاندێکی هەرێمی کوردستان بۆ چارەسەرکردنی کورتهێنانی مووچەی مانگی نۆ لە بە‌غدایە، ئاڤا نیوز زانیویەتی سبەی سێشەممە کۆبوونەوەیەکی دیکە لەگەڵ شاندی عێراق دەکەن و دوایین بڕیاری لەبارەوە دەدرێت، بە ناردن و نەناردنیش ئەم هەفتەیە لیستی مووچە بڵاودەکرێتەوە و دەست بە دابەشکردنی مووچە دەکرێت.

وێنە گەورەکە: حکومەتی هەرێمی کوردستان بۆ مووچەی مانگی نۆ 314 ملیار دینار کورتهێنانی هەیە و زۆربەی کێشەکە پەیوەندی بە نەناردنی بەشێکی مووچەی مانگەکانی ڕابردووەوەیە،  بۆ چارەسەرکردنی ئەم بابەتەش دوو ڕۆژە شاندێکی وەزارەتی دارایی و ئابووریی هەرێمی کوردستان لە بەغدایە.

 

زانیاریی تایبەت: شاندی هەرێمی کوردستان داتا و ڕوونکردنەوەی پێویستیان پێشکەش بە شاندی عێراق کردووە، بەڵام تاوەکو ئێستا بڕیاری پڕکردنەوەی کورتهێنانەکە نەدراوە، ئاڤا نیوز زانیویەتی ڕۆژی سێشەممە کۆبوونەوەیەکی دیکە دەکەن، دواتر کۆبوونەوەی هەفتانەی ئەنجوومەنی وەزیرانی عێراق دەکرێت و ئەگەر تاوەکو ئەوکات یەکلایی نەکرێتەوە، پرسەکە دەخرێتە بەردەم سەرۆکوەزیران محەممەد شیاع سوودانی و وەزیرانی حکومەتی عێراق.

 

لەلایەکی دیکەوە:  سێ سەرچاوەی جیاواز لە حکومەتی هەرێمی کوردستان و وەزارەتی دارایی قسەیان بۆ ئاڤا نیوز کرد و پشتڕاستیان کردەوە، ئەگەر تاوەکو سبەی ئێوارە حکومەتی عێراق بڕیاری پڕکردنەوەی کورتهێنانەکە نەدات و پارە نەنێرێت، حکومەتی هەرێمی کوردستان لیستی مووچە بڵاودەکاتەوە و بە داهاتی ناوخۆ کورتهێنان پڕدەکاتەوە.

ئەوەی پێویستە بیزانیت: بانکە بازرگانییەکانی هەرێمی کوردستان ڕاسپێردراون ئەگەر تاوەکو سبەی ئێوارە بڕیاری خەرجکردنی پارە لە بەغدا نەدرا، ڕۆژی چوارشەممە دەست بە دابەشکردنی مووچەی مانگی نۆ بکەن، هەوڵەکان بۆ ئەوەن لە ماوەی چوار ڕۆژدا و  تاوەکو ڕۆژی شەممە کە دەکاتە ڕۆژێک پێش هەڵبژاردن، سەرجەم مووچەخۆرانی هەرێمی کوردستان مووچە وەردەگرن.