عێراق وشکەساڵی تێنەپەڕاندووە و پێویستی بە 40 ملیار مەتر سێجا ئاوە

ئاڤا نیوز

سەرەڕای بارانبارینی زۆر لە ماوەی چەند هەفتەی ڕابردوودا، هێشتا عێراق مەترسی وشکەساڵی تێنەپەڕاندووە و پێویستی بە گلدانەوەی 40 ملیار مەتر سێجا ئاو هەیە.

وێنە گەورەکە: نزیکەی ساڵێکە تورکیا ئاوی دیجلە و فوراتی لەسەر عێراق گرتووەتەوە، بەمەش لەدوای وەرزی بەهار وڵاتەکە تووشی وشکەساڵی دەبێت و ڕووبەری بیابان زیاد دەکات.

ئەوەی پێویستە بیزانیت: لە سەرەتای وەرزی بارانبارینی ئەمساڵ 10 ملیار مەتر سێجا ئاو گلدراوەتەوە، بەڵام ئەم بڕە بەس نییە بۆ ڕزگاربوون لە وشکەساڵی، چونکە عێراق پێویستی بە گلدانەوەی زیاتر لە 50 ملیار مەتر سێجا ئاو هەیە.

لێدوانی فەرمی: زۆزان کۆچەر، جێگری سەرۆکی لیژنەی کشتوکاڵ و سەرچاوەکانی ئاو لە ئەنجوومەنی نوێنەرانی عێراق بە ئاڤا نیوزی ڕاگەیاند: ئەمساڵ بڕێکی باشی باران باریوە کە کاریگەری دەخاتە سەر باشترکردنی کۆگاکردنی ئاو، بەڵام مەترسییەکە بەردەوامە و  لە ماوەی دوو مانگی داهاتوودا عێراق پێویستی بە کۆگاکردنی 40 ملیار مەتر سێجا ئاو هەیە.

ئەمەش بزانە: بیابان زیاتر لە %65ـی ڕووبەری خاکی عێراق پێکدەهێنێت و وڵاتەکە لە ڕیزبەندی پێشەوەی ئەو وڵاتانەیە کە دەکەونە ژێر کاریگەری گۆڕانکاری کەشوهەوا. هاوکات 80%ـی کۆی ئاوی عێراق بۆ کەرتی کشتوکاڵ بەکاردەهێنرێت.