کۆشکی سپی: هەر هەوڵێک بۆ کوشتنی ترەمپ بە جەنگ دادەنرێت

ئاڤا نیوز

 

ئەمەریکا هۆشداریی دەداتە ئێران و دەڵێت، هەر هەوڵێک بۆ کوشتنی دۆناڵد ترەمپ بە کردەوەی جەنگی دادەنرێت.

 

وێنە گەورەکە: دوای ئەوەی ئەمریکا لە نزیکەوە چاودێری هەڕەشەکانی ئێرانی کردووە بۆ سەر سەرۆکی پێشووی ئەمریکا، واشنتن ئەو وڵاتە ئاگادار دەکاتەوە لە هەر هێرشێک و دەڵێت، بەتووندی وەڵاممان دەبێت و بە کردەوی جەنگی هەژماری دەکەین.

 

ڕاگەیێنراوی فەرمی: شۆن ساوث، گوتەبێژی ئەنجوومەنی ئاسایشی نەتەوەیی کۆشکی سپی ڕایگەیاند: " ئێمە ئەو بابەتە بە پرسێکی ئاسایشی نەتەوەیی هەژمار دەکەین، بە توندی ئیدانەی هەر هەڕەشەیەکی ئێران دەکەین، لەسەر داوای جۆ بایدن پەیاممان بۆ بەرزترین پلە باڵاکانی حکومەتی ئێران ناردووە، ئەگەر هەوڵێک بۆ کوشتنی ترەمپ هەبێت، واشنتن وەک کردەوەیەکی جەنگی مامەڵەی لەگەڵدا دەکات و ئەو وڵاتە ڕووبەڕووی سزای سەخت دەبێتەوە".

 

زانیاریی زیاتر: لە کانوونی دووەمی ساڵی 2020، ترەمپ زانیاری پێگەیشت کە پلانی هێرشکردنە سەر دیپلۆماتکاران و هێزە چەکدارەکانی ئەمەریکا لە عێراق و لوبنان و سوریا دانراوە، هاوکات فەرمانی هێرشێکی ئاسمانی دا و قاسم سولەیمانی فەرماندەی ئەوکاتی هێزی قودسی ئێرانی کوشت.