دیلان عەبدوڵڵا: لە کابینەی نۆیەم گرنگییەکی بەرچاو بە کەرتی هاتووچۆ دراوە

ئاڤا نیوز

 

بەڕێوەبەری ئەندازەی هاتووچۆ ڕایدەگەیێنێت، لە کابینەی نۆیەم گرنگییەکی بەرچاو بە کەرتی هاتووچۆ دراوە و یەکەمجاریشە بەو شێوەیە گرنگی بە بواری هاتووچۆ و بابەتی سەلامەتی لە ڕێگاو بان بدرێت.

 

لێدوانی فەرمی: دیلان عەبدوڵڵا، بەڕێوەبەری ئەندازەی هاتووچۆی هەولێر بە ئاڤا نیوزی ڕاگەیاند: لەگەڵ دەستبەرکاربوونی کابینەی نۆیەمی حکومەتی هەرێمی کوردستان، یەکەمجارە بەو شێوەیە گرنگی بە بواری هاتووچۆ و بابەتی سەلامەتی لە ڕێگاو بان بدرێت لە ڕووی ڕێکخستنەوەی شەقامەکان و سەلامەتی گشت بەکارهێنەرانی ڕێگاو بان و لە ڕووی کەمکردنەوەی ڕووداوی هاتووچۆ.

 

کاریگەریی و لێکەوتەکان: واتە گرنگییەکی بەرچاو بە کەرتی هاتووچۆ دراوە، ئەمەش وایکردووە تا ڕاددەیەک ڕووداوی هاتووچۆ کەمتر ببێتەوە، شەقامەکان زیاتر ڕێکخستنیان پێوە دیار بێت و جەنجاڵی تێدا کەمتر ببێتەوە، هاوکات سیمایەکی جوانتری هەبێت لە ڕووی هێلکاریکردنی شەقامەکان و بۆیاخکردنی ڕەسیفەکان و دانانی هێمای جۆراوجۆری هاتووچۆ.

 

بابەتە ستراتیژییەکان: کابینەی نۆیەم ڕۆڵێکی گرنگی هەبووە لە دروستکردنی ڕێگاوبان و بە دووسایدکردنی ڕێگاکان و نۆژەنکردنەوەی ڕێگاکان، هاوکات بەردی بناغەی چەندین پرۆژەی بە دووسایدکردنی ڕێگاکانیش دانراون، ئەمەش کاریگەری لەسەر سەلامەتی و کەمکردنەوەی ڕووداوەکان و نەهێشتنی جەنجاڵی هەبووە.