لویس ساکۆ لە ریاز: سیاسەتی ئێستای عێراق دروستکردنی دووبەرەکییە لەنێوان پێکهاتەکان

ئاڤا نیوز

پاتریارک و سەرۆکی کەنیسەی کلدانی لە عێراق و جیهان، نیگەرانی لە سیاسەتی ئێستای عێراق دەردەبڕێت و بە مەترسیدار وەسفی دەکات. هۆشداریش دەدات لەوەی دەبێتە هۆی دووبەرەکی لەنێوان پێکهاتەکان.

چیرۆکی سەرەکی: کاردیناڵ لویس ساکۆ لە پانێڵێکدا بە ناونیشانی (بوونیادنانی ئاشتی و فرەچەشنیی لە هۆکارەکانی ڕاگەیاندن) لە کۆڕبەندی سعوودیە بۆ ڕاگەیاندن لە ڕیاز قسەی کرد. لە کۆڕبەندەکەدا جگە لە بابەتە میدیاییەکان کە تەوەری سەرەکین، بوار بۆ گفتوگۆی بابەتە سیاسی و کۆمەڵایەتییەکانیش دەڕەخسێنرێت.

 لێدوانی فەرمی: لویس ساکۆ لەبارەی بارودۆخی کریستیانەکان لە عێراق گوتی: "ئێمە لە ململانێداین، پێکەوەژیان لە مەترسیدایە. سیاسەتی ئێستای عێراق نەک هەر لە بەرژەوەندیی پێکەوەژیاندا نییە، بەڵکو دووبەرەکی لەنێوان پێکهاتەکان دروست دەکات".

باکگراوند: پێکهاتەی کریستیان لە عێراق تا دێت کەم دەبێت و بەتایبەت دوای هێرشی داعش لە ساڵی 2014 سەدان هەزاریان کۆچیان کردووە، بەشێکیشیان پەنایان بۆ هەرێمی کوردستان هێناوە. 

بۆچی گرنگە: ئەو گلەییەی ئێستا کریستیانەکان لە عێراق هەیانە، لە هەرێمی کوردستان نیانە و بێ جیاوازی باوەشی بۆ سەرجەم پێکهاتەکان کردووەتەوە، بەتەواوی ئازادن و بووەتە شوێنی پێکەوەژیانی سەرجەم پێکهاتەکان.