هۆکاری وەستانی هەناردەی غاز ئێران بۆ عێراق ئاشکرا دەکرێت

ئاڤا نیوز

هۆکارەکانی وەستانی هەناردەکردنی غازی ئێران بۆ عێراق ئاشکرا دەکرێت، کە بەهۆی زیادبوونی بەکارهێنانی ناوخۆیی لە وەرزی زستاندا و هەندێک کێشەی تەکنیکی بووە.

 

چیرۆکی سەرەکی: وەزارەتی کارەبای عێراق دوێنێ سێشەممە 2025-12-23، ڕایگەیاند، بەهۆی دۆخێکی لەناکاو هەناردەی غازی ئێران بۆ وڵات ڕاگیرا و لە ئەنجامدا نزیکەی 4500 مێگاوات کارەبا کەمی کرد، هەوڵەکانیش بۆ دۆزینەوەی وزەی جێگرەوە لە ناوخۆ بەردەوامن.

 

بڵاوکراوەی فەرمی: ئاژانسی هەواڵی "میهر"ی نیمچە فەرمی لەبارەی وەستانی لەناکاو و کاتیی هەناردەی غاز بۆ عێراق نووسیوویەتی: "لە وەرزی زستاندا و بەهۆی سەرماوە، بەکارهێنانی گازی سرووشتی لە ئێران بە شێوەیەکی بەرچاو زیاد دەکات".

 

لەلایەکی دیکەوە: بەگوێرەی هەواڵێکی ئاژانسی ڕۆیتەرز، ئێران بەرپرسانی عێراقی ئاگادارکردووەتەوە لەوەی پێویستییان بە غازی سرووشتییە لە ناوخۆ، هەربۆیە هەناردەکردنی بۆ عێراق ڕاگرتووە.

 

لەهەمان کاتدا: ڕۆیتەرز، ئاماژەی بەوەداوە عێراق هیچ پلان و جێگرەوەیەکی بۆ غازی ئێرانی نییە و ناچارە لەبەرامبەر کەمبوونەوەی هاوردەی غاز لە ئێرانەوە پێدانی کارەبا بە هاووڵاتییەکانی کەم بکاتەوە.

 

ئەوەی لەوبارەیەوە دەگوترێت: ئەحمەد مووسا، گوتەبێژی وەزارەتی کارەبا، ڕایگەیاندووە، لایەنی ئێرانی بەهۆی بارودۆخێکی کتوپڕەوە ئاگاداریان کردوونەتەوە لە ڕاگرتنی هەناردەی غاز. ئەم دۆخە بووەتە هۆی لەکارکەوتنی بەشێک لە وێستگەکان و کەم بوونەوەی بڕی کارەبای بەردەست بۆ هاووڵاتییان، دەشڵێ: وەزارەتی کارەبا بە هەماهەنگی لەگەڵ وەزارەتی نەوت دەستی کردووە بە بەکارهێنانی سووتەمەنی ناوخۆیی بۆ کارپێکردنی وێستگەکان، وەک ڕێکارێکی خێرا بۆ کەم کردنەوەی کاریگەرییەکان.