نزیکەی 100 هەزار دەنگدەر لە هەڵبژاردن بێبەش دەبن

 ئاڤا نیوز

 

بۆ بەشداریکردن لە هەڵبژاردنی پەرلەمانی کوردستان، نزیکەی 100 هەزار دەنگدەر بایۆمەترییان کردووە، بەڵام کارتەکانیان وەرنەگرتووەتەوە، بەهۆیە لە مافی دەنگدان بێبەش دەبن.

 

وێنە گەورەكە: ڕۆژی یەکشەممەی داهاتوو 20-10-2024 هەڵبژاردنی گشتی بۆ خولی شەشەمی پەرلەمانی كوردستان دەکرێت و کۆمیسیۆن دڵنیایی داوە هەموو ئامادەکارییەکان بۆ ئەو هەڵبژاردنە تەواو بوون، ڕۆژی 15ـی ئەم مانگەش ماوەی پێدانەوەی کارتی بایۆمەتری دەنگدان بە هاووڵاتیان کۆتاییهات.

 

لێدوانی فەرمی: ئەیسەر یاسین، گوتەبێژی ڕاگەیاندنی هەڵبژاردنی پەرلەمانی کوردستان لە کۆمیسیۆنی هەڵبژاردنەکانی عێراق بە ئاڤا نیوزی ڕاگەیاند: 97 هەزار و 893 دەنگدەر بەهۆی وەرنەگرتنەوەی کارتی بایۆمەترییەوە، لە دەنگدان و بەشداریکردن لە هەڵبژاردنی پەرلەمانی کوردستان بێبەش دەبەن.

 

گوتیشی: ڕۆژی هەینی 18-10-2024، 215 هەزار و 960 دەنگدەر بەشداری لە دەنگدانی تایبەت دەکەن و سەرجەمیان کارتی بایۆمەترییان وەرگرتووەتەوە.

 

لەلایەکی دیکەوە: لە کۆی دوو ملیۆن و 899 هەزار و 615 دەنگدەر کە مافی بەشداریکردنیان لە هەڵبژاردنی پەرلەمانی کوردستان هەیە، نزیکەی 97%ـیان کارتی بایۆمەترییان وەرگرتووەتەوە و دەتوانن بەشداریی هەڵبژاردنەکە بکەن.