دادگای فیدراڵی لە بەرژەوەندیی مووچەخۆرانی هەرێمی کوردستان بڕیاری دا

ئاڤا نیوز

دادگای فیدراڵی، حکومەتی عێراق پابەند دەکات بە ناردنی مووچە و شایستە داراییەکانی هەرێمی کوردستان و نەناردنی نە نایاسایی لەقەڵەم دەدات. جەختیش دەکاتەوە دەبێت سەرجەم مووچەخۆران لە سەرتاسەری عێراق پێکەوە مووچە وەربگرن.

بۆچی گرنگە:  بە جێبەجێکردنی بڕیاری دادگای فیدراڵی عێراق کۆتایی بە مشتومڕی مووچە و بودجە لە نێوان هەولێر و بەغدا دێت و دەبێت ڕێکبکەون، بەمەش چیتر مووچە دواناکەوێت.

بڕیاری فەرمی: جاسم محەممەد، سەرۆکى دادگاى فیدراڵى دوای کۆبوونەوەی ئەمڕۆ لە کۆنگرەیەکی ڕۆژنامەوانیدا نێوەڕۆکی بڕیارەکەی ئاشکراکرد و ڕایگەیاند: "بەپێى ماددەى 116 لە دەستووری عێراق، دەبێت داهاتى فیدراڵى عێراق بەشێوەیەکی دادپەروەرانە بۆ هەرێمی کوردستان و پارێزگاکان تەرخان بکرێت. بەجۆرێک بتوانێت کاروبارەکانی جێبەجێ بکات، بە لەبەرچاوگرتنى داهاتەکانى و پێویستى و ژمارەى دانیشتووانی بەپێى بڕگەکانى دەستوور".

نێوەڕۆکی بڕیارەکە:

- ده‌بێت حكومه‌تی عێراق مووچه‌ی فه‌رمانبه‌رانی هه‌رێمی کوردستان بدات و دابین نه‌كردنی پێشێلكارییه‌.

--ده‌بێت مافی فه‌رمانبه‌ران و خانه‌نشینانی هه‌رێمی كوردستان پارێزراو بێت و دەبێت سێ مووچەکەی ساڵی ڕابردوویان پێبدرێت.

-دەبێت حکومەتی عێراق بەبێ قەرز مووچە دابین بکات.

- حکومەتی هەرێمی کوردستان پابەند دەبێت بە ڕۆژانە ڕادەستکردنی بڕی ئەو نەوتەی لەسەری ڕێککەوتوون، لەبەرامبەردا حکومەتی ناوەندی شایستە داراییەکانی هەرێمی کوردستان دابین دەکات.

لەبارەى دابیننەکردنى مووچە، دەبێت ڕێککارى پێویست بگرێتەبەر و گەرەنتی ئەوە بکرێت پارە بنێردرێت.

- پرسی مووچە پەیوەستە بە ژیانی خەڵکەوە و نابێت لەگەڵ پرسە سیاسییەکان تێکەڵ بکرێت، پێویستە هەولێر و بەغدا لەمبارەیەوە بەیەکجاری ڕێکبکەون.