گەشتە ئاسمانییەکانی فڕۆکەخانەی نێودەوڵەتیی هەولێر ئاسایی بوونەوە

ئاڤا نیوز

دوای وەستانێکی کاتی، گەشتە ئاسمانییەکانی فڕۆکەخانەی نێودەوڵەتیی هەولێر ئاسایی بوونەوە و دوو فڕۆکەش کە لەکاتی خۆیاندا نەیانتوانی بنیشنەوە گەڕانەوە. 


چیرۆکی سەرەکی: ئێوارەی ئەمڕۆ بەهۆی زیادبوونی تەم لە ئاسمانی شاری هەولێر، فڕۆکەخانەی نێودەوڵەتیی هەولێر سەرجەم گەشتە ئاسمانییەکانی هاتوو و ڕۆشتووی ڕاگرت، بەهۆیەوە دوو فڕۆکە لەکاتی گەڕانەوەیان لە ئەڵمانیاوە بۆ هەولێر نەیانتوانی بنیشنەوە. 

لێدوانی فەرمی: ئەحمەد وشیار، بەڕێوەبەری فڕۆکەخانەی نێودەوڵەتیی هەولێر بە ئاڤا ڕاگەیاند: گەشتە ئاسمانییەکانی فڕۆکەخانەی هەولێر ئاسایبوونەوە.

- بەڕێوەبەری فڕۆکەخانەی نێودەوڵەتیی هەولێر گوتیشی: ئەو دوو فڕۆکەی نەیانتوانی لەکاتی خۆیدا لە هەولێر بنیشنەوە، ئێستا بەهۆی ئاسایبوونەوەی دۆخەکە ئەو دوو فڕۆکەیە دەگەڕێنەوە. 

لەلایەکی دیکەوە: لاوەند مەموندی، بەڕێوەبەری کۆمپانیای فلای ئەربیل  پێشتر بە ئاڤا میدیای ڕایگەیاند: دوو فڕۆکە کە لە ئەڵمانیاوە هاتبوون بۆ هەولێر و بەهۆی دروستبوونی تەم نەیانتوانی بنیشنەوە.

زانیاریی پەیامنێر: عوبەید هەرکی، پەیامنێری ئاڤا گوتی: ئاستی بینین ئێستا ئاسایبووەتەوە و فڕۆکەخانەی هەولێریش چالاکییەکانی دەستیپێکردووەتەوە.