دادگای تاوانی نێودەوڵەتیی تانەیەکی لەسەر فەرمانی دەستگیرکردنی نەتانیاهۆ ڕەتکردەوە

ئاڤا نیوز 

دادگای تاوانی نێودەوڵەتیی بە فەرمی ئەو تانەیەی ئیسرائیلی ڕەتکردەوە کە تیایدا ڕەوایەتی لێکۆڵینەوەکانی دادگاکەی لەسەر تاوانە ئەنجامدراوەکان لە کەرتی غەززە خستبووە ژێر پرسیارەوە.

بڵاوکراوەی فەرمی: دادگای تاوانی نێودەوڵەتی جەختی لەسەر مانەوە و جێبەجێکردنی فەرمانی دەستگیرکردن بۆ بنیامین نەتانیاهۆ، سەرۆکوەزیرانی ئیسرائیل و یۆئاڤ گالانت، وەزیری پێشووی بەرگری ئیسرائیل کردەوە، کە لە مانگی 11ی 2024 دەرچووبوون، ئەوەش بە تۆمەتی ئەنجامدانی تاوانی جەنگ و دژی مرۆڤایەتی.

ئەوەی پێویستە بیزانیت: ئیسرائیل بانگەشەی ئەوەی دەکرد، هێرشەکانی 7ی ئۆکتۆبەری حەماس دۆخەکەی بە شێوەیەک گۆڕیوە کە پێویست دەکات دادگا ئاگادارکردنەوەیەکی فەرمی نوێ بۆ لێکۆڵینەوە لە بابەتەکە بڵاوبکاتەوە، بەڵام دادگای تاوانی نێودەوڵەتی ئەم پاساوەی ڕەتکردەوە.

 
بۆچوونی لایەنی بەرامبەر: ئۆرێن مارمۆرشتاین، وتەبێژی وەزارەتی دەرەوەی ئیسرائیل لە پۆستێکدا لە تۆڕی کۆمەڵایەتی ئێکس ڕایگەیاند، وڵاتەکەی بڕیارەکە ڕەتدەکاتەوە و دادگای بە "بە سیاسی کردن"ی دۆسیەکە تۆمەتبار کرد.