ڕوونکردنەوەیەک لە کۆمیسیۆنەوە لەبارەی ئەنجامی دەنگدانی تایبەت

ئاڤا نیوز

 

کۆمیسیۆنی هەڵبژاردنەکانی عێراق لەبارەی ئەو ئەنجامەی یەکێتی لەبارەی دەنگدانی تایبەت بڵاویکردووەتەوە، ڕوونکردنەوە دەدات و دەڵێت پەیوەندی بە ئەوانەوە نییە. 

 

وێنە گەورەکە: بەپێی داتای فەرمیی کۆمسیۆنی باڵای هەڵبژاردنەکانی عێراق، لە پارێزگای هەڵەبجە 952 کەس مافی دەنگدانی هەبووە، بەڵام یەکێتی نیشتیمانی کوردستان دەڵێت کە هەزار و 807 دەنگمان لەو پارێزگایە هێناوە.

 

لێدوانی  فەرمی: عیماد جەمیل، سەرۆکی تیمی میدیایی کۆمیسیۆنی هەڵبژاردنەکانی عێراق بە ئاڤا نیوزی گوت: "ئەو ئەنجامەی یەکێتی بڵاویکردووەتەوە پەیوەندی بە ئێمەوە نییە،  ئێمە ڕۆژی دووشەممە 24 کاتژمێر دوای دەنگدانی گشتی، ئەنجامی بەرایی و هەموو زانیارییەکی پەیوەست بە هەردوو دەنگدانی تایبەت و گشتیی بڵاودەکەینەوە".

 

لەلایەکی دیکەوە: لەبارەی ژمارەی دەنگدەرانی تایبەت لە سنووری پارێزگای هەڵەبجە، عیماد جەمیل وتی: ژمارەی دەنگدەرانی تایبەت لە سنووری پارێزگای هەڵەبجە تەنیا 952 دەنگدەرن و هەر ژمارەیەکی دیکە لەبارەی ئەو پارێزگایەوە بڵاوبکرێتەوە پەیوەندی بە ئێمەوە نییە". یەکێتی دەڵێت هەزار و 807 دەنگیان لە سنووری ئەو پارێزگایە هێناوە، ئەمە لەکاتێکدایە تەنیا 952 کەس مافی دەنگدانی تایبەتیان هەبوو، عیماد جەمیل جارێکی دیکە دوووپاتی کردەوە: "ئێمە تەنیا 952 دەنگدەرمان لەو سنوورە هەیە، بۆیە ئەو ژمارانە پەیوەندی بە ئێمەوە نییە".

 

ئەوەی پێویستە بیزانیت: ئەمڕۆ یەکشەممە کاروان گەزنەیی، گوتەبێژی لیستی یەکێتی  لە کۆنگرەیەکی ڕۆژنامەوانیدا ئەنجامی دەنگدانی تایبەتی بڵاوکردەوە، بەپێی داتاکەی ئەوان پارتی:  74 هەزار و 513 دەنگ، یەکێتی: 70 هەزار و 10 دەنگ، نەوەی نوێ:  5 هەزار و 329 دەنگ،  یەکگرتوو: سێ هەزار و 5 دەنگ، هەڵوێست: دوو هەزار و 516 دەنگ، کۆمەڵ: دوو هەزار و نۆ دەنگ، بەرەی گەل: هەزار و 598 دەنگ، گۆران: 706 دەنگیان هێناوە.

 

باکگراوند: دوێنێ هەینی پرۆسەی دەنگدانی تایبەت بۆ خولی شەشەمی پەرلەمانی کوردستان بەڕێوەچوو، 215 هەزار و 960 کەس مافی دەنگدانیان هەبوو، ڕێژەی بەشداریکردن 97% بوو، بە کۆی گشتی 208 هەزار و 521 دەنگدەر بەشدارییان لە دەنگدانی تایبەتدا کرد.