گوتەبێژی پارتی: لەبەرامبەر پێشێلكارییەكان سكاڵامان تۆمار كردووە

ئاڤا نیوز

 

گوتەبێژی پارتی دیموكراتی كوردستان ئاشكرای دەكات، لەبەرامبەر ئەو پێشێلكارییانەی لە ڕۆژی دەنگدانی تایبەت هەبووە سكاڵایان تۆمار كردووە.

 

لێدوانی فەرمی: مەحموود محەممەد، گوتەبێژی پارتی دیموكراتی كوردستان لە كۆنفڕانسێكی ڕۆژنامەوانیدا سەبارەت بە پرۆسەی دەنگدان ڕایگەیاند: "ئومێد دەكەین پڕۆسەكە بە ئارامیی و یەكترقبوڵكردن بەڕێوەبچێت و خەڵكیش دەزانێت دەنگ بە كێ و دەدات و كێ دەتوانێت ئەم وڵاتە بەڕێوە ببات".

 

وێنە گەورەکە: سەرلەبەیانی ئەمڕۆ کاتژمێر 7:00 پڕۆسەی هەڵبژاردنی پەرلەمانی کوردستان بە بەشداری دوو ملیۆن و 683 هەزار و 618 کەس دەستیپێکرد و بڕیارە تا کاتژمێر شەشی ئێوارە پڕۆسەکە بەردوام بێت.

 

لەلایەكی دیكەوە: گوتەبێژی پارتی سەبارەت بە پێشێلكارییەكانی ڕۆژی دەنگدانی تایبەت گوتی: ئێمەش وەك هەر لایەنێكی دیكە، بریكار و سەرپەرشتیارەكانمان لە بنكەكانی دەنگدان ئەگەر تێبینییەكیان هەبووبێت سكاڵایان تۆمار كردووە.

 

ئەوەی پێویستە بیزانیت: مەحموود محەممەد لەبارەی بارودۆخی دوای هەڵبژادن بە میدیاکانی ڕاگەیاند: "ئێمە وەك پارتی دەرگامان بۆ هەموو لایەنەكان كراوە بووە و كراوەش دەبێت، ئەگەر ئەو هەموو كەف و كوڵەی كە لە بانگەشەی هەڵبژاردن هەبوو، تەنیا بۆ بانگەشە بووبێت و شتی دیكەی لەپشتەوە نەبووبێت بێگومان دەبێت لێكتێگەیشتن هەبێت و وڵات هی هەمووانە و دەبێت بەیەكەوە بەڕێوەی ببەین."