قوباد تاڵەبانی: ئاگام لە وردەکاریی دەنگهێنانی کاندیدی کریستیان لە شارباژێڕ نییە

ئاڤا نیوز

 

ئەمڕۆ یەکشەممە قوباد تاڵەبانی، جێگری سەرۆکی حکومەت لە بنکەیەکی دەنگدان لە شاری سلێمانی دەنگی دا، لەبارەی ئەو دەنگانەی کاندیدێکی کۆتای کریستیان لە شارباژێڕ هێناویەتی وتی، "ئاگام لە وردەکاریی ئەوە نییە".

 

وێنە گەورەکە: ئەمڕۆ یەکشەممە کاتژمێر 7:00  هەڵبژاردنی پەرلەمانی کوردستان بە بە شداری دوو ملیۆن و 683 هەزار و 618 کەس دەستیپێکرد، هاوکات لەکاتژمێرەکانی دەستپێکی پرۆسەی هەڵبژارن، سەرکردە و بەرپرسانی حزبی لە بنکەی جیاواز دەنگیان دا.

 

لێدوانی فەرمی: قوباد تاڵەبانی، جێگری سەرۆکی حکومەت ڕایگەیاند، "پیرۆزبایی لە خەڵکی هەرێمی کوردستان دەکەم بۆ ئەم ڕۆژە پیرۆزە، هیوادارم دەنگدەرانیش وەک ڕاگەیاندنکاران ئاوا گەرم و گوڕ بن، بەشداربن لە پرۆسەکە و دەنگ بدەن بەو لایەنەی کە دەتوانێت باشترین خزمەت بە کۆمەڵانی خەڵکی کوردستان بکات".

 

زانیاریی زیاتر: قوباد تاڵەبانی لەبەشێکی دیکەی قسەکانیدا بۆ میدیاکان ئەوەشی وت، "هەڵبژاردنی پەرلەمانی کوردستان بۆ خزمەتکردنی خەڵکی کوردستانە، ئەگەر خەڵک سەربکەوێت حیزبەکەی منیش سەردەکەوێت، لە دەرئەنجامی ئەم پرۆسەیە دوو هێزی سەرەکیی هەیە لەم کوردستانە کە ئەمڕۆ یەکلایی دەبێتەوە".

 

باکگراوند: ئەوانەی لە هەرێمی کوردستان مافی دەنگدانیان هەیە ژمارەیان دوو ملیۆن و 801 هەزار و 672 کەس مافی دەنگدانیان هەیە.