وەزارەتی ناوخۆ لەبارەی دەنگدان: بردنەژوورەوەی مۆبایل قەدەغەیە

ئاڤا نیوز

 

وەزارەتی ناوخۆی هەرێمی کوردستان لەبارەی دەنگدانی گشتیی ڕاگەیێنراوێکی بڵاوکردەوە و ڕایگەیاند، پێویستە لە بنکەکانی دەنگدان پشکنین بکرێت و ڕێگا بە بردنەژوورەوەی مۆبایل و کامێرا نەدرێت.

 

وێنە گەورەکە: کاتژمێر 07:00 سەرلەبەیانی ئەمڕۆ ڕێککەوتی 2024/10/20  پڕۆسەی دەنگدان بۆ هەڵبژاردنی پەرلەمانی کوردستان بە بەشداری بە بە شداری دوو ملیۆن و 683 هەزار و 618 کەس دەستیپێکرد.

 

ڕاگەیێنراوی فەرمی: وەزارەتی ناوخۆی هەرێمی کوردستان ڕاگەێێنراوێکی چوار خاڵی دەربارەی دەنگدانی گشتیی بڵاوکردەوە تێیدا دەڵێت، دوا بە دوای کۆبوونەوەی حکومەتی هەرێمی کوردستان لەگەڵ کۆمیسیۆنی باڵای هەڵبژاردنەکان، لە پێناوی سەلامەتی پرۆسەی هەڵبژاردن، پێویستە ئەم خاڵانەی خوارەوە جێبەجێ بکرێت:

 

یەکەم: قەدەغەیە دەنگدەر مۆبایل و کامێرا بباتە ژوورەوە.

دووەم: قەدەغەیە کاندیدەکان لە مەودای 150 مەتر لە بنکەکانی دەنگدان نزیک ببنەوە. 

سێییەم: تا مەودای 150 مەتر لە دووری بنکە، پێویستە هەموو پۆستەری کاندید و لیستەکان لە بنکەکانی دەنگدان لێبکرێنەوە.

چوارەم: جگە لەو هێزانەی لە چوارچێوەی هێزی لێژنەی ئەمنی ڕاسپێردراون، چ هێز و کەسێک بە جلی سەربازیی بۆی نییە لە بنکەکانی دەنگدان نزیک بێتەوە.

 

لەلایەکی دیکەوە: لەبەشێكی دیکەی ڕاگەیێنراوەکەی کۆمیسیۆن سەبارەت بەو کەسانەی رێگەیان پێدەدرێت مۆبایل ببەنە ژوورەوە، هاتووە: تەنها ڕۆژنامەنووسان و نوێنەرانی کیانە سیاسییەکان و چاودێرانی ناوخۆیی نێودەوڵەتیی ئەوانەی باجی ڕێگاپێدانییان لەلایەن کۆمیسیۆن هەیە، ڕێگاپێدراون مۆبایل و کامێرا ببەنە ژوورەوە.

 

ئەمەش بزانە: ڕۆژی هەینی 2024/10/18 لە دەنگدانی تایبەت لە سەرجەم پارێزگاکانی هەرێمی کوردستان  بەڕێوەچوو؛ لە بنکەی پارێزگای هەڵەبجە  بەهۆی بردنەژوورەوەی مۆبایل گرژی و ئاڵۆزی دروست بوو و ژمارەیەک میدیا و نوێنەری لایەنە سیاسیی لەکاتی ڕووماڵ و چاودێری پڕۆسەکە کرانە دەرەوە.