لیژنەیەک بۆ وردبینیکردنى ناوى وانەبێژان پێکدەهێنرێت

ئاڤا نیوز

 

بە فەرمانێکى وەزاری ژمارە (2557)ی وەزارەتی خوێندنی باڵا و توێژینەوەی زانستی، د. ئارام محەممەد قادر بریاریدا بە پێکهێنانى لیژنەیەکى باڵا و تایبەت بەمەبەستى پێداچونەوە و وردبینیکردنى ناو و سەرەتاکانى سەرجەم مامۆستایانى وانەبێژى سەر بە وەزارەتى خوێندنى باڵا و توێژینەوەى زانستى.

 

ڕاگەیێنراوی فەرمی: د. ئارام محەممەد قادر، وەزیرى خوێندنى باڵا و توێژینەوەى زانستى ڕایدەگەیەنێت: ئامانج لە پێکهێنانى ئەم لیژنە باڵایە، وردبینى و پێداچونەوەیە بە ناوى سەرجەم ئەو وانەبێژانەى کە بە گشتاندنمان بە ژمارە (17338) لە ڕێکەوتى 4-9-2024 لە زانکۆکانى کوردستان داواکراوە و بە نوسراوى زانکۆکان ئاراستەى وەزارەتەکەمان کراوە و ڕەزامەندى دارایی بۆ بەگرێبەست بونیان دەرچووە.

 

زانیاریی زیاتر: وەزیری خوێندنی باڵا دەڵێت: ئەم لیژنەیە بۆ دڵنیابونەوەى سەرجەم وانەبێژانە لە ڕاستى و درووستى ناوەکانیانە، بە شێوەیەک بە بێ جیاوازى و لە چوارچێوەى ڕێنماییەکاندا سەرجەم وانەبێژانى سودمەند بگەن بە مافى ئاسایی و یاسایی خۆیان کە ئەویش دەرچونى فەرمانى بە گرێبەست بوونیانە.

 

لەلایەکی دیکە: ئاماژەی بەوە کرد، فەرمانە وەزارییەکە لەلایەن د. توانا نەجەف محەممەدخان، بەڕێوەبەرى گشتى کارگێڕى و دارایی لە دیوانى وەزارەت سەرۆکایەتى دەکرێت، بە ئەندامییەتى هەریەک لە بەڕێوەبەرانى تایبەتمەندى وەزارەت، بۆیە بە مەبەستى جێبەجێکردنى ناوەڕۆکى فەرمانەکە، ئەمڕۆ 23-10-2024 لیژنەکە یەکەمین کۆبونەوەى خۆى دەستپێکرد.