دوای 43 مانگ سەردانی ئۆجەلان دەکرێت و لەبارەی پرۆسەی ئاشتی پەیامی هەیە

ئاڤا نیوز

عومەر ئۆجەلان، برازای عەبدوڵڵا ئۆجەلان، ڕێبەری زیندانیکراوی پەکەکە ڕایگەیاند، دوای 43 مانگ چاوی بە  ئۆجەلانی مامی کەوتووە. ئۆجەلان بە برازاکەیدا لەبارەی دۆزی کورد و پرۆسەی ئاشتی پەیامێکی ناردووە و دەڵێت: "دەسەڵاتی تیۆری و پراکتیکیم هەیە ئەم ململانێ تووندوتیژییە بگوازمەوە بۆ زەمینەی یاسایی و سیاسی".

بڵاوکراوەی فەرمی: عومەر ئۆجەلان لە ئێکس ڕایگەیاند: "ڕۆژی چوارشەممە 23-10-2024، دوای چەند ساڵێک ئێمە وەکو خێزانێک لەگەڵ ئۆجەلان کۆبووینەوە" ئاماژەی بەوەش داوە دوایین جار کە چاوی بە ئۆجەلان کەوتبێت لە 3-3-2020 بووە، داواش دەکات وەک سەردانی ڕۆتینی خێزان و مافێکی یاسایی خۆیان بەبێ گوێدانە بارودۆخەکە سەردانکردنیان بۆ لای ئۆجەلان بەردەوام بێت.

بابەتی ستراتیژی: ئۆجەلان بە عومەر ئۆجەلانی برازای کە پەرلەمانتاری دەم پارتییە، پەیامێکی لەبارەی پرۆسەی ئاشتی ناردووە و گووتەیەتی: "گۆشەگیری بەردەوامە، ئەگەر هەلومەرجەکان سەرهەڵبدەن، من دەسەڵاتی تیۆری پراکتیکیم هەیە کە ئەم ململانێیە لە زەمینەی  تووندوتیژییەوە بگوازمەوە بۆ زەمینەی یاسایی و سیاسی". لەبارەی تەندورستییەوە عومەر ئۆجەلان دەڵێت: "تەندروستی باش بوو و سڵاوی بۆ هەمووان هەبوو".

ئەوەی پێویستە بیزانیت: ئەم سەردانە لەکاتێکدایە دوای دەستپێشخەرییەکەی دەوڵەت باخچەلی، چەند ڕۆژێکە پرۆسەیەکی نوێی ئاشتی و چارەسەری پرسی کورد لە توکیا و باکووری کوردستان هاتووەتەوە بەرباس و بەرپرسانی باڵای تورکیا قسەی جیاوازی لەبارەوە دەکەن.

باکگراوند: دەوڵەت باخچەلی، سەرۆکی پارتی نەتەوەیی تورکیا (مەهەپە) ڕۆژی 22-10-2024، داوای کرد گۆشەگیریی سەر ئۆجەلان هەڵبگیرێت و ڕێگەی پێبدرێت لە پەرلەمانی تورکیا قسە بکات.