ڕامی نووری: سەرۆك بارزانی نەبووایە كریستیان خاوەنی سێ كورسییەكەش نەدەبوو

ئاڤا نیوز

 

لە كۆی ئەو پێنج كورسییەی بۆ پێكهاتەكانی هەرێمی كوردستان لە پەرلەمان دیاریكراوە، سێ كورسیی بۆ كریستیانەكانە، لەوبارەیەوە كاندیدێكی دەرچووی كریستیان لە بازنەی هەولێر دەڵێ، ئەگەر سەرۆك بارزانی نەبووایە ئەو سێ كورسییەشمان نەدەبوو.

 

وێنە گەورەکە: دوای بڕیاری دادگای فیدراڵی سەبارەت بە نەهێشتنی كورسیی پێكهاتەكان لە پەرلەمانی كوردستان، دەستەی دادوەریی هەڵبژاردنەکانی عێراق لە کۆی 100 کورسیی پەرلەمانی کوردستان، پێنج کورسی بۆ پێکهاتەکان تەرخان كرد، بەمەش پێنج کورسی پێکهاتەکان گەڕایەوە و لە هەڵبژاردنی پەرلەمانی كوردستان، چەند حیزب و كاندیدێكی سەربەخۆی كریستیان و توركمان كێبڕكێیان لەسەر بەدەستهێنانی كورسییەكان كرد.

 

لێدوانی فەرمی: ڕامی نووری، کاندیدی دەرچووی کریستیانەکان لە بازنەی هەولێر بە ئاڤا نیوزی ڕاگەیاند: پێشووتر ئێمەی كریستیان شەش كورسیمان لە پەرلەمان هەبوو، بۆ ئەم هەڵبژاردنە كرا بە نیوە و تەنیا سێ كورسی مایەوە، ئەگەر هەوڵەكانی سەرۆك بارزانی نەبووایە، كریستیان خاوەنی ئەو سێ كورسییەش نەدەبوو، چونكە بڕیاری دادگای فیدراڵی ئەوە بوو كە هیچ كورسییەك بۆ پێكهاتەكان لە پەرلەمانی كوردستان نەمێنێت.

 

لەلایەكی دیكەوە: ئەو كاندیدە دەرچووەی كریستیانەكان كە توانی بە 6752 دەنگ كورسیی كریستیانەكان بۆ خۆی مسۆگەر بكات ڕاشیگەیاند: بەداخەوە هەندێ لایەنی سیاسی مامەڵەیان بە مافی ڕەوای ئێمە كرد و كریستیانیان وەك كارتێكی قازانج بەكارهێنا بۆ ڕاگرتنی ئەوەش سەرۆك بارزانی ڕۆڵی كاریگەری هەبووە.

 

ئەوەش بزانە: بۆ خولی شەشەمی پەرلەمانی كوردستان پێنج كورسی بۆ پێكهاتەكان دیاریكراوە، كورسییەك بۆ كریستیان و یەكیش بۆ توركمان لە بازنەی هەولێر، كورسییەك بۆ كریستیان و یەكیش بۆ توركمان لە بازنەی سلێمانی و كورسییەكیش بۆ كریستیان لە بازنەی دهۆك.