پشتیوان سادق: ئەو لایەنانەی ئێستا سكاڵایان هەیە با خۆیان وەڵامی خۆیان بدەنەوە

ئاڤا نیوز

 

پشتیوان سادق، ئەندامی مەكتەبی سیاسیی پارتی دیموكراتی كوردستان وەڵامی ئەو لایەنە سیاسییانە دەداتەوە كە سكاڵایان لەسەر ئەنجامەكانی هەڵبژاردنی خولی شەشەمی پەرلەمانی كوردستان هەیە و دەڵێت، "با خۆیان وەڵامی خۆیان بدەنەوە"

 

وێنە گەورەکە: لەدوای ڕاگەیاندنی ئەنجامی بەرایی هەڵبژاردنی خولی شەشەمی پەرلەمانی کوردستان، ژمارەیەک لیست و کاندید گومانیان خستە سەر ئەنجامەکان و ڕایانگەیاند، "ساختەکاری" کراوە و ئەو ئەنجامەی ڕاگەیێنراوە دەنگی ڕاستەقینەی ئەوان نییە.

 

لێدوانی فەرمی: پشتیوانی سادق، ئەندامی مەكتەبی سیاسیی پارتی دیموكراتی كوردستان لە كۆنفڕانسێكی ڕۆژنامەوانیدا ڕایگەیاند: ئەو لایەنانەی ئێستا سكاڵایان هەیە، دەیانگوت ئەگەر كۆمیسیۆن هەڵبژاردنێكی پاك و بێگەرد بكات، تێكڕای كورسییەكانی پارتی ناگاتە  20 کورسی، بەڵام دەنگەكانی پارتی لەم هەڵبژاردنە زیاترە لە 800 هەزار دەنگ، ئەگەر دەنگەكانی مووسڵ و كەركووكیش كۆبكەینەوە دەنگەكانی پارتی دەگاتە زیاتر لە ملیۆنێك دەنگ، ئەمەش نیشانەی دڵسۆزی و وەفاداریی خەڵكە بۆ پارتی.

 

لەلایەكی دیكەوە: ئەو ئەندامەی مەکتەبی سیاسی پارتی سەبارەت بە تۆمارکردنی سکاڵا لەلایەن ئەو لایەنانەوە لەبارەی ئەنجامی هەڵبژاردنەکان گوتی، "دوێنێ و پێرێ بوو ئەو لایەنانە دەچوونە بەغدا و دەیانگوت كۆمیسیۆنی هەڵبژاردنی كوردستان شەرعییەتی نییە و دەبێت كۆمیسیۆنی عێراق سەرپەرشتی پرۆسەی دەنگدان بكات، ئێستاش سكاڵایان لەسەر ئەنجامی هەڵبژاردن هەیە، ئەو لایەنە سیاسییانە با خۆیان وەڵامی خۆیان و سكاڵاكانیان بدەنەوە".