كۆمەڵی دادگەری: ڕەنگە بایكۆتی پرۆسەی سیاسی بكەین

ئاڤا نیوز

 

كۆمەڵی دادگەریی كوردستان، لە ئەنجامەكانی هەڵبژاردنی خولی شەشەمی پەرلەمانی كوردستان ناڕازییە و بەرپرسێكی باڵای حیزبەكەش دەڵێت هەموو ئەگەرێك لەبەردەممان كراوەیە.

 

وێنە گەورەکە: کۆمەڵی دادگەری لە هەڵبژاردنی ئەمجارە بەراورد بە هەڵبژاردنی ساڵی 2018، چوار کورسی کەمی کردووە و لە حەوت کورسییەوە بۆ سێ کورسی دابەزیوە، ئەمەش حیزبەکەی تووشی شۆک کردووە.

 

لێدوانی فەرمی: شوان ڕابەر، ئەندامی ئەنجوومەنی باڵای كۆمەڵی دادگەری، بە ئاڤای ڕاگەیاند: ئەو دەنگانەی بۆ كۆمەڵی دادگەری دانراون، دەنگی كۆمەڵ نین و ئێمە بەهیچ شێوەیەك قبوڵی ناكەین و پێمان وایە ساختەیە، بۆ ئەو مەبەستە سبەی سەركردایەتیی كۆمەڵ كۆدەبێتەوە و هەموو ڕێگەیەك لەبەردەممان كراوەیە.

 

لەلایەكی دیكەوە: شوان ڕابەر كە هاوكات ئەندامی دەرنەچووی كۆمەڵی دادگەرییە لە بازنەی هەولێر ڕاشیگەیاند: ئەگەری ئەوە هەیە بەشداریی لە پەرلەمان نەكەین و بایكۆتی پەرلەمان و پرسی سیاسیش بكەین لە هەرێمی كوردستان.

 

ئەوەش بزانە: بەرپرسانی كۆمەڵی دادگەری ڕایانگەیاندووە كە چەندین بەڵگەیان سەبارەت بە ساختەكاریی دەنگەكانیان هەیە و دەیخەنە بەردەم دادگای فیدڕاڵی عێراق و دەیانەوێ گرفتەكە لەوێ یەكلا بكەنەوە و سكاڵا تۆمار دەكەن.

 

ئەوەی پێویستە بیزانیت: بەپێی ناوەڕۆکی سكووپێكی ئاڤا نیوز لە ئەگەری كشانەوەی كۆمەڵی دادگەری لە پەرلەمان، كورسییەكانی كۆمەڵ كە ژمارەیان سێیە، دووانیان بۆ پارتی و یەكێكیشیان بۆ یەكێتی دەبێت.

 

باکگراوند: ئەنجوومەنی باڵای کۆمەڵی دادگەری ڕۆژی پێنجشەممە 24-10-2024، پەیامێکی لەبارەی ئەنجامی بەرایی هەڵبژاردن بڵاوکردەوە و ڕایگەیاند: "زانیاریمان بەدەست گەیشتووە بەمەبەست و بەرنامە بۆ داڕێژراو، دەنگەکانمان یان پووچەڵ کراون یان بۆ لایەنی دیکە هەژمارکراون.