عەلی باپیر: ناچینە پەرلەمان

ئاڤا نیوز

 

کۆمەڵی دادگەری ڕایدەگەیێنێ، پرۆسەی هەڵبژاردن ساختەکاری تێدا کراوە، بۆیە بایکۆت ڕادەگەیێنن و ناچنە پەرلەمانەوە.

 

چیرۆکی سەرەکی: ئەنجوومەنی سەرکردایەتیی کۆمەڵی دادگەریی کوردستان بەسەرپەرشتیی عەلی باپیر لەبارەی پرۆسەی هەڵبژاردنی خولی شەشەمی پەرلەمانی کوردستان کۆبووەوە.

لێدوانی فەرمی: عەلی باپیر، سەرۆکی کۆمەڵی دادگەری لە کۆنگرەیەکی ڕۆژنامەوانیدا ڕایگەیاند: "ئێمە و چەند لایەنێکی دیکە دڵنیاین پرۆسەی هەڵبژاردن ساختەکاری تێدا کراوە، ئەوانەشی دانی پێدانانێن لە ئێمە دڵنیاترن، ئەو ساختەکارییەی کراوە هەست دەکەین لە دەرەوە کرابێت".

 

عەلی باپیر گوتیشی: "بەپێویستمان زانی ڕایبگەیەنین، ئێمە ناچینە پەرلەمانێکەوە کە پێمانوایە دەستی ساختە و تەزوویری زۆر تێدایە، چاک خوێندنەوەی ئێمەش بۆ هەڵبژاردن ڕاست دەرنەچوو".

 

ئەوەی پێویستە بیزانیت: کۆمەڵی دادگەری کوردستان لە هەڵبژاردنی خولی شەشەمی پەرلەمانی کوردستان 64 هەزار و 710 دەنگی بەدەستهێنا کە دەکاتە سێ کورسی پەرلەمان، ئەمە لەکاتێکدایە لە خولی ڕابرووی پەرلەمان خاوەنی حەوت کورسی بوو.

 

زانیاریی تایبەت:  کورسییەکانی کۆمەڵ یەکێکیان لە بازنەی هەولێر و دوو کورسی لە بازنەی سلێمانین، بەپێی لێکدانەوەی ژووری هەڵبژاردنی ئاڤا میدیا ونەئنجامی بەرایی هەڵبژاردن، دوو کورسییان بۆ پارتی و کورسییەکیان بۆ یەکێتی دەبێت، بەمپێیە کورسییەکانی پارتی دەبنە 41 و یەکێتی 24 کورسی.