لاهوور شێخ جەنگی: ئەم هەڵبژاردنە ڕەنگدانەوەی دەنگ و ڕەنگی خەڵک نییە

کوردستان
2024-10-26

شەیری بکە لە:

لاهوور شێخ جەنگی: ئەم هەڵبژاردنە ڕەنگدانەوەی دەنگ و ڕەنگی خەڵک نییە

عەلی باپیر و لاهوور شێخ جەنگی

ئاڤا نیوز

سەرۆکی بەرەی گەل ڕایدەگەیێنێت، لە هەڵبژاردن ساختەکاری کراوە و ڕەنگدانەوەی حەقیقەتی دەنگ و ڕەنگی خەڵک نییە.

وێنە گەورەکە: لەدوای ڕاگەیاندنی ئەنجامی بەرایی هەڵبژاردنی خولی شەشەمی پەرلەمانی کوردستان، هەندێک لایەنی سیاسی ئەوانەی دەنگی کەمیان هێناوە، وەک کۆمەڵ، هەڵوێست، گۆڕان و بزووتنەوە و ژمارەیەک کاندیدی سەربەخۆ دەڵێن ساختەکاری کراوە، ئەمڕۆش بەرەی گەل دەنگی خۆی خستە پاڵ ئەوان.

چیرۆکی سەرەکی: لاهوور شێخ جەنگی ئێوارەی ئەمڕۆ لە شاری سلێمانی سەردانی عەلی باپیر، سەرۆکی کۆمەڵی دادگەری کرد و گفتوگۆیان لەبارەی ئەنجامەکانی هەڵبژاردن کرد.

ڕاگەیێنراوی فەرمی: لاهوور شێخ جەنگی دەڵێت: "گفتوگۆیەکی بەرهەمدارمان کرد سەبارەت بەو ساختەکاری و کێشانەی لە هەموو هەڵبژاردنێکدا حیزبە دەسەڵاتدارەکانی هەرێم بەرامبەر پرۆسەی دیموکراسی و ناوبانگی هەرێمی کوردستان نابەرپرسیارانە دەیکەن".

ئەوەی پێویستە بیزانیت: ئێوارەی ئەمڕۆ عەلی باپیر لە کۆنگرەیەکی ڕۆژنامەوانیدا ڕایگەیاند، لە پرۆسەی سیاسی دەکشێنەوە و کاندیدە دەرچووەکانیان ناچنە پەرلەمان، بەڵام لاهوور شێخ جەنگی بەڕوونی هەڵوێستی حیزبەکەی ڕانەگەیاندووە و تەنیا دەڵێت: "هەڵوەستەمان کرد لەسەر ئەو بنەما جێگیرەی کە شەرعیەتی ڕاستەقینەی هێزە سیاسییەکان پەیوەستە بە ڕادەی پابەندبوونیان بە پاراستنی دیموکراسی و مافی مرۆڤ، نەک هەڵبژاردنێک کە ڕەنگدانەوەی حەقیقەتی دەنگ و ڕەنگی خەڵک نەبێت".

باکگراوند: بەرەی گەل کە یەکەمجار بوو بەشداری هەڵبژاردن بکات، بەپێی ئەنجامە بەراییەکان 33 هەزار و 365 دەنگ (دوو کورسی) بەدەستهێناوە، ئەمەش لە ئاستی چاوەڕوانی سەرۆکی حیزبەکەدا نییە.