حکومەت لەبارەی ڕێگریکردن لە هەژماری من هۆشداری دەدات

ئاڤا نیوز

 

د.ئومێد سەباح، سەرۆکی دیوانی ئەنجوومەنی وەزیران، لە دوو نووسراوی جیاوازدا کە ڕۆژانی 27 و 28ی ئەم مانگە دەرکراون، لەبارەی ڕێگریکردن لە پرۆژەی هەژماری من هۆشداری دەدات و ڕایدەگەیێنێت، هەر کەسێک ڕێگری لێبکات، یان هەر فەرمانبەرێک کەمتەرخەمی بکات و بەربەست دروست بکات، سزا دەدرێت و ڕێککاری یاسایی بەرامبەر دەگیرێتە بەر. جەختیش دەکاتەوە وەزارەتی دارایی و ئابووری تاکە لایەنی تایبەتمەندە بە دیاریکردنی شێوازی دابەشکردنی مووچە.

وێنە گەورەکە: بافڵ تاڵەبانی، سەرۆکی یەکێتی لەکاتی بانگەشەی هەڵبژاردن چەند جارێک هێرشی کردە سەر پرۆژەی هەژماری من و داوای لە فەرمانبەران کرد ناوی خۆیان لە پرۆژەکە تۆمار نەکەن، دواتر ڕۆژی پێنجشەممە 24-10-2024 میدیاکانی یەکێتی بڵاویان کردەوە، سەرجەم نووسینگە و بنكەكانی پڕۆژەی هەژماری من لە سلێمانی  داخراون، بەڵام سەرچاوەیەک لە پرۆژەی هەژماری من بە ئاڤا نیوزی ڕاگەیاند، پرۆسەکە بەردەوامە، نەوەستاوە و لە فراوانبووندایە.

نووسراوە فەرمییەکان: ئومێد سەباح دوێنێ لەبارەی ڕێگریکردن لە هەژماری نووسراوێکی سێ خاڵی ئاراستەی وەزارەتی داد/ سەرۆکایەتیی داواکاری گشتی، وەزارەتی دارایی و ئابووری و وەزارەتی ناوخۆ کردووە، داوای کردووە ڕێککاری یاسایی  و کارگێڕیی پێویست بگرنەبەر بەرامبەر ئەو بانک و ئەفسەر و پۆلیسانەی ڕێگری دەکەن لە کارمەندانی هەژماری من. هەروەها داوای لە داواکاری گشتی کردووە داواکاریی سزادانیان بەرامبەر بجووڵێنێت.

لە نووسراوێکی دیکەدا کە بەراواری ئەمڕۆی لەسەرە و بۆ وەزارەت و دەستە و فەرمانگەکانی نەبەستراو بە وەزارەت گشتێنراوە، د. ئومێد سەباح داوا دەکات کاری پێویست بکەن بۆ جێبەجێکردنی پرۆژەی هەژماری من و ڕێگریکردن لە هەر سەرپێچییەک و گرتنەبەری ڕێککاری یاسایی و کارگێڕی پێویست و لێپرسینەوە لە فەرمانبەرانی کەمتەرخەم و سەرپێچیکار کە بەربەست دروست دەکەن.  

هەردوو نووسراوەکەی سەرۆکی دیوانی ئەنجوومەنی وەزیران: