پارتی لیژنەیەک بۆ تانەدان لە ئەنجامەکانی هەڵبژاردن دەنێرێتە بەغدا

ئاڤا نیوز

 

پارتی دیموکراتی کوردستان چاوەڕێی ئەنجامی کۆتایی هەڵبژاردنی خولی شەشەمی پەرلەمانی کوردستان دەکات و دواتر  لیژنەیەکی پێنج کەسی دەنێرێتە بەغدا و تانە لە ئەنجامەکانی هەڵبژاردن دەدات.

 

وێنە گەورەکە: پارتی لیژنەیەکی پێنج کەسی پێکهێناوە، لەدوای ڕاگەیاندنی ئەنجامەکان دەچنە بەغدا و تانە لە ئەنجامەکان دەدەن، بەتایبەتی ئەنجامەکانی بازنەی هەڵەبجە، چاودێری بەراوردکاری سکاڵا و دەنگەکان دەکەن.

 

زانیاریی بەدەستهاتوو: بەپێی زانیارییەکانی ئاڤا میدیا، کۆمیسیۆنی باڵای هەڵبژاردنەکانی عێراق ڕۆژی چوارشەممە ئەنجامی کۆتایی هەڵبژاردن ڕادەگەیێنێت.

 

زانیاریی زیاتر: زۆربەی لایەنەکانی بەشدار لەهەڵبژاردنەکان، بەنیازن لە دوای ڕاگەیاندنی ئەنجامی کۆتایی هەڵبژاردن تانە لە ئەنجامەکان بدەن.

ئەوەی پێویستە بیزانیت: لە هەڵبژاردنی پەرلەمانی کوردستان 198 سکاڵا تۆمارکراون و زۆینەیان لە ڕۆژی دەنگدانی گشتی بووە.

ئەوەش بزانە: دوای تێپەڕبوونی هەشت ڕۆژ بەسەرهەڵبژاردنی پەرلەمانی کوردستان، تائێستا 71 سکاڵا لە ڕۆژی دەنگدانی تایبەت و 120 سکاڵا لە ڕۆژی دەنگدانی گشتی و حەوت سکاڵاش لەسەر ناوەندی وردبینیکردنی تایبەت بە هەڵبژاردن تۆمارکراون.