وەزارەتی ناوخۆ: لە سلێمانی پێچەوانەی بڕیاری ئەنجوومەنی وەزیران تەوتین دەستیپێکردووە

ئاڤا نیوز

وەزارەتی ناوخۆی حکومەتی هەرێمی کوردستان ڕایدەگەیێنێت، پڕۆژەی "هەژماری من" لە کۆبوونەوەی ئەنجوومەنی وەزیران بە ڕەزامەندی هەمووان بڕیاری لێ دراوە، ئەوەی لە سلێمانی بە ناوی تەوتین دەکرێت پێچەوانەی ئەو بڕیارەیە.

 

وێنە گەورەکە: ڕۆژی 2-8-2023، سەرۆکوەزیران مەسرور بارزانی پڕۆژەی "هەژماری من"ی ڕاگەیاند، لەپێناو دروستکردنی ژێرخانێکی دیجتیاڵی بۆ مووچەخۆران، تاوەکو ئێستاش زیاتر لە 600 هەزار مووچەخۆر هەژماریان بۆ کراوەتەوە

 

ڕاگەیێنراوی فەرمی: وەزارەتی ناوخۆ ئەمڕۆ سێشەممە نووسراوێکی بڵاوکردووەتەوە و بۆ شەش فەرمانگەی حکومی هاوپێچ کراوە، تیایدا هاتووە: "ئێستا لە هەندێک لە دامەزراوەکانی پارێزگای سلێمانی و هەندێ شوێنی دیکە، پێچەوانەی بڕیاری ئەنجوومەنی وەزیران دەست بە پرۆسەیەکی دیکە کراوە بە ناوی (تەوتین) لە دەرەوەی ڕێنماییەکانی وەزارەتی دارایی و ئابووری حکومەتی هەرێمی کوردستان، کە تاکە لایەنی فەرمی ڕێکخەری لیست و شێوازی دابەشکردنی کەرتی گشتییە لە کوردستان".

 

زانیاریی زیاتر: وەزارەتی ناوخۆ فەرمانگەکانی حکومەت لە پارێزگای سلێمانی ئاگادار دەکاتەوە جگە لە پڕۆژەی هەژماری من، هیچ کار و بەرنامەیەکی دیکە بۆ بەدیجیتاڵکردنی مووچەی فەرمانبەران ڕێگەپێدراو نییە. لەلایەکی دیکەوە فەرمانگەکان ئاگادار دەکاتەوە ئاسانکاری بۆ کارمەندانی پڕۆژەی هەژماری من بکەن، بەپێچەوانەوە لەکاتی بوونی ڕێگری ڕووبەڕووی لێپرسینەوەی یاسایی دەکرێنەوە.

 

لەلایەکی دیکەوە: ئەم بڕیارە وەزارەتی ناوخۆ لەکاتێکدایە، هەریەکە لە ئەنجوومەنی وەزیران و وەزارەتی دارایی و ئابووریی هەرێمی کوردستان ئەو هەوڵەیان ڕەتکردووەتەوە، کە چەند ڕۆژێکە لە پارێزگای سلێمانی بە ناوی (تەوتین) دەستیپێکردووە.