ئەمریکا پيرۆزبايى سه‌ركه‌وتنى هه‌ڵبژاردنى پەرلەمانی کوردستان دەکات

ئاڤا نیوز

باڵیۆزی ئەمریکا لە عێراق لە میانەی کۆبوونەوەی لەگەڵ سەرۆکی هەرێمی کوردستان، پیرۆزبایی سەرکەوتنی هەڵبژاردن لە گەلی کورد کرد، جه‌ختيان له‌ گرنگيى كاركردنى هه‌مه‌لايه‌نه‌ له‌ ناوچه‌كه‌ كرده‌وه‌ بۆ پاراستنى سه‌قامگيرى و ڕێگريكردن له‌ ته‌شه‌نه‌سه‌ندنى زياترى ئاڵۆزييه‌كان. 

 

وێنە گەورەکە: دوا نیوەڕۆی ئەمڕۆ سێشەممە، نێچیرڤان بارزانی پێشوازی لە ئێلینا ڕۆمانۆوسكى، باڵیۆزی ئەمریکا لە عێراق کرد و بارودۆخی ناوچەکەیان تاوتوێ کرد. 

 

له‌ كۆبوونه‌وه‌يه‌كدا هه‌ڵبژاردنى په‌رله‌مانى كوردستان و ئه‌نجامه‌كانى تاوتوێ كران و ڕۆمانۆوسكى، پيرۆزباييى سه‌ركه‌وتنى هه‌ڵبژاردنى له‌ نێچيرڤان بارزانى و گه‌لى كوردستان كرد. له‌مباره‌يه‌وه‌ هه‌ردوولا جه‌ختيان له‌ گرنگيى لێكگه‌يشتنى لايه‌نه‌ سياسييه‌كان بۆ پێكهێنانى حكوومه‌ت كرده‌وه‌.‌

 

لە لایەکی دیکەوە: له‌ كۆبوونه‌وه‌كه‌دا، باسيان له‌ په‌يوه‌ندييه‌كانى حكوومه‌تى هه‌رێمى كوردستان و حكوومه‌تى عێراقى فيدراڵ و هه‌وڵه‌كانيان بۆ چاره‌سه‌ركردنى كێشه‌كانى نێوانيان كرد. هه‌ردوولا ستايشى به‌رده‌واميى گفتوگۆکانیان بۆ چاره‌سه‌ركردنى كێشه‌كان به‌ لێكگه‌يشتن كرد و كۆكبوون له‌سه‌ر ئه‌وه‌ى چاره‌سه‌ربوونى كێشه‌كانى هه‌ولێر ـ به‌غدا، سه‌قامگيريى وڵات پته‌وتر ده‌كات.

 

له‌ ته‌وه‌رێكى ديكه‌ى كۆبوونه‌وه‌كه‌دا تيشكيان خسته‌ سه‌ر دوا پێشهاته‌كانى دۆخى مه‌ترسيدارى ڕۆژهه‌ڵاتى ناوه‌ڕاست و جه‌ختيان له‌ گرنگيى كاركردنى هه‌مه‌لايه‌نه‌ له‌ ناوچه‌كه‌ كرده‌وه‌ بۆ پاراستنى سه‌قامگيرى و ڕێگريكردن له‌ ته‌شه‌نه‌سه‌ندنى زياترى ئاڵۆزييه‌كان. هه‌ر له‌مباره‌يه‌وه‌ دووپاتيان كرده‌وه‌ كه‌ پێويسته‌ عێراق له‌ ململانێ و كێشه‌كانى ناوچه‌كه‌، به‌دوور بێت.