ئاڤا هۆکاری دواخستنی کۆبوونەوەی پەرلەمانی عێراق ئاشکرا دەکات

ئاڤا نیوز

 

دوای دروستبوونی گرژیی لەنێوان جێگری سەرۆکی پەرلەمان و پەرلەمانتارێکی سوننە، کۆبوونەوەکانی پەرلەمانی عێراق دواخرا.

 

وێنە گەورەکە: ئەمڕۆ سێشەممە 29-10-2024، کۆبوونەوەی پەرلەمانی عێراق کرا،  دواتر بەهۆی دروستبوونی گرژییەوە سوننەکان هەلەکەیان قۆستەوە و پرۆژە یاسای هەڵوەشاندنەوەی بڕیارەکانی بەعس و گەڕاندنەوەی موڵک و ماڵی خەڵک بۆ خاوەنەکانیان دواخست و کۆبوونەوەکەی پەرلەمانیش هەڵگیرا.

 

لێدوانی فەرمی: موسەننا ئەمین، ئەندامی فراکسیۆنی یەکگرتوو لە پەرلەمانی عێراق سەبارەت بە دروستبوونی گرژییەکانی ناو کۆبوونەوەکەی ئەمڕۆی پەرلەمان بە ئاڤا نیوزی ڕاگەیاند: "گرژیی لەنێوان شاخەوان عەبدوڵڵا و هەیبەت حەلبوسی، بەهۆی پرۆژە یاسای هەڵوەشاندنەوەی بڕیارەکانی بەعس و گەڕاندنەوەی موڵک و ماڵی خەڵک بۆ خاوەنەکانیان لە چەند ناوچەیەک بوو".

 

زانیاریی زیاتر: موسەننا ئەمین ئەوەشی گوت "برادەرانی سوننە گرژییەکەیان دروست کرد، ئامانجیان تێکدانی کۆبوونەوەکە و ناچارکردنی سەرۆکایەتی پەرلەمان بوو، بۆ ئەوەی دانیشتنەکە هەڵبگرن، بۆ ئەوەش سودیان لە هەڵەی پاسەوانێک وەرگرت، کە لە ژووی دانیشتنەکەبوو، گرژییەکەیان زیاتر کرد، تا ئاستێک نەتوانرێت ئارامی هۆڵەکە لەلایەن سەرۆکایەتی پەرلەمانەوە بپارێزرێت.