نێچیرڤان بارزانی: حکومەت بەبێ پارتی و یەکێتی پێکناهێنرێت

ئاڤا نیوز

 

نێچیرڤان بارزانی، سەرۆكی هەرێمی كوردستان، بەشداریی لە پەناڵێكی دیداری مێری لە هەولێر كرد و تیشكی خستە سەر ڕێوشوێنەكانی دوای هەڵبژاردن و پێكهێنانی حكومەت  و ڕایگەیاند: حکومەت بەبێ پارتی و یەکێتی پێکناهێنرێت.

 

لێدوانی فەرمی: نێچیرڤان بارزانی، سەرۆكی هەرێمی كوردستان ڕایگەیاند: لەم هەڵبژاردنە، براوەی سەرەكی  خەڵكی كوردستان بوو، گەلی كوردستان سەلماندی كە شایستەی ئەوەیە لەمە زیاتری بۆ بكرێت و شایستەی ئەوەیە سوپاس بكرێت، بە هەموو پێوەرێك هەڵبژاردنی خولی شەشەمی پەرلەمانی كوردستان زۆر سەركەوتوو بوو.

 

لەلایەكی دیكەوە: لەبارەی ڕۆڵی ئۆپۆزسیۆن لە حکومەتی داهاتوو، سەرۆکی هەرێمی کوردستان گوتی: هەڵبژاردن كرا و تازە تێپەڕی و ناكرێت هەر لە كەشوهەوای هەڵبژاردن بین و دژی یەك قسە بكەین، ئۆپۆزسیۆن دەتوانێت ڕۆڵی خۆی ببینێت لە پەرلەمان، بوونی ئۆپۆزسیۆن لە هەر سیستەمێك دەتوانێت یارمەتیدەدەر بێت بۆ چاودێریی، بەڵام دەسەڵات و ئۆپۆزسیۆن دوژمن نین بەڵكوو ڕكابەری سیاسین و ئۆپۆزسیۆنیش بەشێكە لەم گەلە.

 

گۆشەیەكی دیكە: سەبارەت بە ئەو لایەنانەی كە ڕەخنە لە ئەنجامی هەڵبژاردنی پەرلەمانی كوردستان دەگرن و دەڵێن ساختەكاری هەبووە، نێچیرڤان بارزانی ڕایگەیاند: "ڕێزم بۆ هەموو ئەو هێزانەی باس لە كێشە دەكەن بەڵام پێموایە یەكێك بووە لە هەڵبژاردنە هەرە پاكەكان كە لە هەرێمی كوردستان كراوە، ئیدی ئێستا كاتی ئەوەیە كە لایەنە سیاسییەكان دابنیشن و گفتوگۆ بكەن، بەپێی ئەنجامی هەڵبژاردن پێویستە حكومەتێكی هاوپەیمانی پێكبهێنرێت و بەبێ پارتی و یەكێتی حكومەت پێكناهێنرێت.

 

ئەوەی پێویستە بیزانیت: "هیچ هێزێك لە كوردستان هێندە كورسی نییە كە بتوانێت خۆی بەتەنیا حكومەت پێكبهێنێت، ئەوەی گرنگە ئەوەیە بە زووترین كات حكومەت پێكبهێنرێت، ئەمە بۆ پێگەی هەرێمی كوردستانیش گرنگە لە بەغدا". نێچیرڤان بارزانی وایگوت.

 

زانیاریی زیاتر: نێچیرڤان بارزانی دروستبوونەوەی دوو ئیدارەیی لە هەرێمی كوردستان ڕەتدەکاتەوە و  دوو ئیدارەیی بە "سفر ئیدارە" وەسف دەکات.

 

گۆشەیەکی دیکەی دیمەنەکە: لە کۆتایی گوتارەکەیدا لە دیداری مێری سەرۆکی هەرێمی کوردستان مامەڵەی حکومەتی عێراق بەرامبەر هەرێمی کوردستان بە مەرکەزی ناوبرد، هەروەها ئارامیی دۆخی عێراق بەستەوە بە  چارەسەرکردنی کێشەکانی هەولێر و بەغدا.