حەلبووسی: هیچ کەسێک بەبێ ڕەزامەندی تەقەدوم نابێتە سەرۆکی پەرلەمان

ئاڤا نیوز

 

سەرۆکی پارتی تەقەدوم ڕایدەگەیێنێت، ئەو کەسەی دەبێتە سەرۆکی پەرلەمان دەبێت ڕەزامەندی پارتی تەقەدومی لەسەر بێت، حەلبووسی پشتیوانی خۆشی بۆ مەحموود مەشهەدانی دووپات دەکاتەوە.

 

وێنە گەورەکە: چوارچێوەی هەماهەنگی لە دوایین کۆبوونەوەی خۆیدا داوای کرد ڕۆژی پێنجشەممە دانیشتنێک بۆ هەڵبژاردنی سەرۆکی نوێی پەرلەمان بکرێت، پەرلەمانیش هەمان ئەو ڕۆژەی بۆ هەڵبژاردنی سەرۆکەکەی دەستنیشانکرد.

 

لێدوانی فەرمی: محەممەد حەلبووسی، سەرۆکی پارتی تەقەدوم لە دیمانەیەکی تەلەڤزیۆنیدا لە بەرامبەر ئەو داوایەی لایەنە شیعییەکان ڕایگەیاند: ئەگەر نیەتێکی باش هەیە بۆ ئەوەی ئەو پرسە یەکلابکرێتەوە و پشتیوانی لە مەحموود مەشهەدانی بکەن، با کاندیدەکانی دیکە بکێشنەوە، ئەمەش مەرج نییە بەڵکو لە دوایین کۆبوونەوە ڕێککەوتنی لەسەر کراوە.

 

زانیاریی زیاتر: بە گوتەی حەلبووسی: بەبێ پاڵپشتی پارتی تەقەدوم هیچ کەسێک پۆستی سەرۆکی پەرلەمان وەرناگرێت، ئەو کەسەی دەبێتە سەرۆکی پەرلەمان دەبێت ڕەزامەندی پارتی تەقەدومی لەسەر بێت.

 

لەلایەکی دیکەوە: سەرۆکی پارتی تەقەدوم پێداگری لەسەر ئەوە دەکات کە ئەوان "قبووڵمان نییە هیچ کەسێک بەسەرمان بسەپێنرێت، قبووڵ ناکەین بیانەوێت کەسێکی دۆڕاومان بەسەردا بسەپێنرێت".