سەباح شێخ حەبیب: بە دووری دەبینم ڕێژەی یاسایی بۆ دانیشتنی پەرلەمان تەواو بێت

ئاڤا نیوز 

 

ئەندامێکی کوردی ئەنجوومەنی نوێنەران بە دووری دەبینێت ڕێژەی یاسایی بۆ دانیشتنی ئەمڕۆ پەرلەمان بۆ هەڵبژاردنی سەرۆکێک بۆ ئەنجوومەنەکە تەواو بێت و هۆکارەکەشی بۆ ڕێکنەکەوتنی لایەنە سوننییەکان لەنێو خۆیاندا دەگەڕێنێتەوە.

 

وێنە گەورەکە: دوای پێنج مانگ و 12 ڕۆژ بڕیارە کاتژمێر 1:00ی پاش نیوەڕۆی ڕۆژی پێنجشەممە 31-10-2024, جارێکی دیکە دانیشتنی ئەنجوومەنی نوێنەرانی عێراق بۆ هەڵبژاردنی سەرۆکێکی نوێ بۆ ئەنجوومەنەکە کۆببێتەوە.

 

لێدوانی فەرمی: سەباح شێخ حەبیب، ئەندامی ئەنجوومەنی نوێنەرانی عێراق بە دەروون مەلا ناجی، پەیامنێری ئاڤا میدیای لە بەغدا ڕاگەیاند: "بە دووری دەبینم ئەمڕۆ سەرۆکی پەرلەمان هەڵبژێردرێت، چونکە تاوەکو ئێستا لایەنە سوننییەکان لەنێوخۆیاندا ناکۆکن و نەگەیشتوونەتە بڕیارێکی کۆتایی. ئەوەی من زانیومەو پێشبینی دەکەم ئەمڕۆش نیساب تەواو نابێت".

 

لەلایەکی دیکەوە: لەبارەی هەڵوێستی لایەنە کوردییەکان سەباح شێخ حەبیب ڕایگەیاند: لایەنە کوردییەکان بەشێوەیەکی گشتی لەگەڵ ئەوەن ئەمڕۆ ئەم هەڵبژاردنە ئەنجام بدرێت، چونکە بەهۆی نەبوونی سەرۆک لە ڕابردوودا چەندین گرفت هاتووەتە پێشەوە لەسەر تێپەڕاندنی چەند پرۆژەیاسایەکی گرنگ.

 

کاریگەریی و لێکەوتەکان: بە بڕوای ئەو ئەندامەی کوردەی پەرلەمانی عێراق، ئەگەر بێت سەرۆکێک بۆ پەرلەمان هەڵبژێردرێت بە دڵنیایی لە ڕۆژانی داهاتوودا ئەو بابەتانەی کە گرژی و ئاڵۆزیی لەسەر دروستبووە وەک ڕەتکردنەوەی دەنگدان لەسەر پرۆژەیاساکانی گەڕانەوەی موڵکەکان بۆ خاوەنەکان، لێبووردنی گشتی و باری کەسیێتی، دوای هەڵبژاردنی سەرۆک لایەنە سیاسییەکان بە گفتوگۆ لەناو پەرلەمان ڕێکبکەون و دەنگیان لەسەر بدرێت.