چەند پەیامێک لە سەرۆکوەزیران بارزانییەوە لە هەڵەبجە

ئاڤا نیوز

سەرۆکوەزیران بارزانی داوا لە حکومەتی عێراق دەکات بەزووترین کات ڕێککارەکانی بە پارێزگاکردنی هەڵەبجە تەواوبکرێن و، بودجەیەکی تایبەت بۆ بەهێزکردنی ژێرخانی ئابووری و بووژاندنەوەی پارێزگاکە تەرخان بکرێت.

چیرۆکی سەرەکی: مەسرور بارزانی، سەرۆکوەزیرانی هەرێمی کوردستان، لە میانی سەردانەکەیدا بۆ پارێزگای هەڵەبجە، لە مەراسیمی دانانی بەردی بناغەی پرۆژەی پردی تووەقت گوتارێکی پێشکەش کرد و چەند پەیامێکی ڕاگەیاند.

پوختەی قسەکانی سەرۆکوەزیران بارزانی:

- چەندین ساڵە حکومەتی عێراق ئامادەنییە بەپێی دەستوور قەرەبووی زیانلێکەوتووانی دەستی ڕژێمی پێشووی بەعس بکاتەوە؛ لەکاتێکدا هەڵەبجە نموونەیەکی هەرە دیاری تاوانە دڕندەکانی ڕژێمی بەعسە، پێویستبوو قوربانییان بەشێوەیەکی شایستە  قەرەبوو بکرێنەوە.

- پێویستە ڕووبەڕووی حکومەتی فیدراڵی ببینەوە و داواکارییەکانی خەڵکی کوردستان و هەڵەبجەییەکانی بە بیر بهێنینەوە. پێویستە هەموومان خۆمان بە قەرزاری خەڵکی هەڵەبجە بزانین و لە داهاتوودا بتوانین قەرەبووی دانیشتووانەکەی بکەینەوە و زیاتر خزمەتی خەڵکی ئەو ناوچەیە بکەین.

-لەلایەک تاوانمان بەرامبەر دەکرێت، لەلایەکی دیکە قورگمان دەگرن، لەولاشەوە خۆیان وەک فریادڕەس پێشاندەدەن و خەڵکانێک بەلاڕێدا دەبەن، ئەم ڕەفتارانەی بەرامبەر بە خەڵکی کوردستان دەکرێن، چیتر قابیلی قبوڵ نین.

- حکومەتی فیدراڵی یان دەبێت خۆیان لە سەرجەم یاساکانی ڕژێمی پێشوو بێبەری بکات، یان دەبێت بەرپرسیارێتیی لە ئەستۆ بگرن و دان بەوەدا بنێن کە زوڵم دەرهەق بە خەڵكی هەرێمی کوردستان کراوە.

- کێشەو ئاستەنگەکانی بەردەم بە پارێزگاربوونی هەڵەبجە تاوانێکە بەرامبەر بە خەڵکی ئەم ناوچەیە دەکرێت. جێگەی سەرسوڕمانە ڕێککارەکان لەلایەن ئەنجوومەنی نوێنەرانی عێراق بە بیانووی جۆراوجۆر تەواوناکرێن و تا ئێستا دەنگی لەسەر نەدراوە.

- داوا لە ئەندامانی ئەنجوومەنی عێراق دەکەین چیتر ئەم بابەتە بەسیاسی نەکرێت و بەزووترین کات دەنگ بە پارێزگابوونی هەڵەبجە بدرێت و بودجەی پێویستی بۆ تەرخان بکرێت.

- خەڵکی خۆشەویستی هەڵەبجە دڵنایبن ئێمە هەمیشە دڵمان لەگەڵ ئێوەیە و هەموو هەوڵێک دەخەینە گەڕ لە پێناو داوا ڕەواکانی ئێوەی خۆشەویست.

- دەڤەری هەڵەبجە و شارەزوور و هەورامان پێگەیەکی گرنگی و تایبەتی لە کوردستان هەیە، چونکە مەڵبەندێکی دیاری رووناکبیری و خوێندەواری بووە لە کوردستان.

- ساڵی ڕابردوو توانیمان هەناری کوردستان بەتایبەتی هەناری هەڵەبجە هەناردەی دەرەوەی هەرێمی کوردستان بکەین و خۆشبەختانە ئێستا لە بازاڕەکانی کەنداو وەک بڕاندێکی بەرهەمی کوردستان دەناسرێت.

- بە تەوابوونی پردی تووەقوت سوودێکی زۆر بە خەڵکی ئەم دەڤەرە دەگات، بەتایبەتی پارێزگای هەڵەبجە و ناوچەکانی ئیدارەی سەربەخۆی گەرمیان بەیەکەوە دەبەستێتەوە، کاریگەرییەکی باشی لە بواری پەرەپێدانی ئالوگۆڕی بازرگانی و هەروەها بووژانەوەی کەرتی گەشتوگوزاری دەبێت.