لیژنەی فەتوای سلێمانی: دەکرێت برنج و مەڕ و قازیش لەبری زێر ببێتە مارەیی ئافرەتان

ئاڤا نیوز

 

سەرۆكی لیژنەی فەتوا لە سلێمانی ئاماژە بە بەخشینی برنج، مەڕ، قاز و مریشک دەکات وەک مایەی مارەیی بۆ ئافرەتان کە بتوانن سوودی لێ ببینن.

 

لێدوانی فەرمی: د. محەممەد پێنجوێنی، سەرۆكی لیژنەی فتوای سلێمانی ئاڤا نیوزی ڕاگەیاند: لە ئیسلامدا هەر شتێک موڵکایەتیی هەبێت دەتوانن بۆ مایەی ئافرەتان لەبری زێر و ئاڵتوون بەکار بهێنرێت، واتە دەکرێت لەبری زێڕ، تۆنێک برنج یان مەڕێک، قاز و مریشکێک وەک مارەیی بدرێت بە ئافرەتان.

 

لەلایەکی دیکەوە: لەبارەی بەرزبوونەوەی نرخی زێڕ لەبازاڕەکاندا و کاریگەری لەسەر مارەیی سەرۆكی لیژنەی فتوای سلێمانی دەڵێت: "ئێستا ژمارەی مسقاڵەکانی زێر لە مارەییدا کەمکراوەتەوە، جاران ئەگەر 20 مسقال زێر وەک مارەیی بەخشرا بێت، ئێستا بەهۆی بەرزبوونەوەی نرخەکەی کەمکراوەتەوە بۆ پێنج مسقاڵ، ئەوەی دیکەش وەک قەرز دەمێنێتەوە و پێویستە دواتر مافی ئافرەتەکە بدرێت".

 

ئەمەش بزانە:  "ئەو خۆراکانەی لە مارەیی دەدرێت، دەکرێت برنجی خۆماڵی و خۆراکەکانی دیکەش بن کە لە بازاڕ دەفرۆشرێن، واتا مەرج نییە ئەو برنجەی دەدرێت، بەرهەمی خۆماڵی بێت، دەکرێت لە بازاردا بکڕدرێن، واتە تۆنێک برنج وەک مارەیی بدرێت و پەیوەندیی نێوان ژن و میرد لەسەر بنەمای خۆشەویستییە نەک مایەی ئافرەتان" د. محەممەد پینجوێنی وادەڵێت.

 

گۆشەیەکی دیکەی دیمەنەکە:  بەگوتەی سەرۆکی فەتوای سلێمانی "زاناکانی ئیسلام بۆ هێشتنەوەی مافی ئافرەت مارەییان وەک پێویستیی داناوە، بۆ ئەوەی ئافرەتەکە شتێکی هەبێت و بتوانێت پشتی پێ ببەستێت، بۆیە هەر شتێک نرخ و بەهای هەبێت، دەتوانرێت وەک مارەیی ببەخشرێت".