ڕووسیا و چین تێڕوانینیان بۆ هەڵبژاردنی ئەمریکا چییە؟

ئاڤا نیوز

 

لەگەڵ نزیکبوونەوەی ‌هەڵبژاردنی سەرۆکایەتیی ئەمریکا، کێبڕکێی نێوان دۆناڵد ترەمپ، کاندیدی کۆمارییەکان و کامالا هاریس، کاندیدی دیموکراتەکان تا دێت گەرمتر دەبێت و وڵاتانیش هەڵوێستی خۆیان دەردەبڕن. 

 

وێنە گەورەکە: گۆڤاری فۆرێن پۆلیسی ئەمریکی باسی لە هەڵوێستەکانی ڕووسیا و چین کردووە سەبارەت بە هەڵبژاردنەکانی ئەمریکا کە بڕیارە ڕۆژی سێشەممە 5ی نۆڤێمبەر بەڕێوەبچێت.

 

چی ڕوودەدات: ڕووسیا دەیەوێت دۆناڵد ترەمپ براوەی هەڵبژاردنەکان بێت، ترەمپ پێزانینێکی زۆری بۆ ڤلادیمیر پووتین سەرۆکی ڕووسیا هەیە، وەک ترەمپ ئاماژەی پێکردووە، شەڕی ئۆکراینا لە بەرژەوەندی پووتین کۆتایی پێبهێنێت. 

 

لەلایەکی دیکەوە: تا ئێستا چین تێڕوانینی خۆی سەبارەت بە هەڵبژاردنەکانی ئەمریکا ئاشکرا نەکردووە، لەبەرئەوەی تا ئێستا ترەمپ و هاریس سیاسەتێکی ڕوونیان بەرامبەر بە چین دەرنەبڕیوە، بەڵام ئەوەی نەگۆڕە، گرژیی و کێشەکانی باجە، ترەمپ هەڕەشەی سەپاندنی باجی زیاتری بەسەر چیندا کردووە. 

 

ئەمەش بزانە: پێشتر وا بڵاوکرایەوە، هەریەکە لە ڕووسیا، چین و ئێران دەیانەوێت بە دەستوەردان و دروستکردنی ناوەڕۆکی ساختە کاریگەری لەسەر هەڵبژاردنەکانی ئەمریکا دروست بکەن،  هەر بۆیە ترەمپ ئاماژەی بەوە داوە، ئەگەر لە هەڵبژاردنەکاندا براوە نەبێت، هۆکارەکەی ''سەختاکارییە''.