عێراق و ئێران جەخت لە پاراستنی سنوورە هاوبەشەکانیان دەکەنەوە

ئاڤا نیوز

 

وەزیری ناوخۆی عێراق لەگەڵ هاوتا ئێرانییەکەی جەخت لە دەستەبەرکردنی ئاسایشی سنوورە هاوبەشەکانی نێوانیان دەکەنەوە، لەگەڵ تاوتوێکردنی چەند پرسێکی دیکە.

 

چیرۆکی سەرەکی: عەبدولئەمیر شەممەری، وەزیری ناوخۆی عێراق بە سەرۆکایەتیی شاندێک لە ڕاوێژکاران و بەڕێوەبەرە گشتییەکان، ڕۆژی دووشەممە 4-11-2024 گەیشتە تاران و لەگەڵ ئەسکەندەر موئمنی، وەزیری ناوخۆی ئێران کۆبووەوە. لە کۆبوونەوەکە تاوتوێی ژمارەیەک دۆسیەی جێی بایەخی هەردوو وڵات کران.

 

ڕاگەیێنراوی فەرمی: وەزارەتی ناوخۆی عێراق ڕایگەیاند: لە کۆبوونەوەی نێوان وەزیری ناوخۆی عێراق و هاوتا ئێرانییەکەی باس لە کۆمەڵێک بابەت کران، لەوانە سەردانیکارانی چلە و دەستەبەرکردنی ئاسیشی سنوورە هاوبەشەکان، ئەمە جگە لە یاداشتنامەی لێکتێگەیشتنی نێوان هەردوو وڵات.

 

بەتەنیشت ئەم بابەتەوە: کۆبوونەوەکە چەند تەوەرێکی دیکەشی لەخۆگرتبوو، لەوانە ڕاهێنان، ئاڵوگۆڕی ئەزموونەکان، سەرنجخستنە سەر ئەو خوێندکارانەی کە بۆ خوێندنی ئەکادیمی لە بوارە ئەمنییەکان ڕەوانەی ئێران کراون، هاوکات بابەتەکانی پەیوەست بە هاتووچۆ و کاری پاسپۆرت.

 

لەلایەکی دیکەوە: ئەسکەندەر موئمنی، وەزیری ناوخۆی ئێران هەوڵەکانی عێراقی لە بواری بەرەنگاربوونەوەی ماددە هۆشبەرەکان و تاوانەکان بە گشتیی و بەرقەرارکردنی ئاسایش بەرز نرخاند و پێشوازیی لە کاری هاوبەشی نێوان هەردوو وڵات کردەوە.