موقتەدا سەدر: بۆ عەرەبێک شەرمەزارییە هیواکانی لەسەر کەسێکی "پیر یان شێت" هەڵبچنێت

ئاڤا نیوز 

 

ڕێبەری ڕەوتی نیشتمانی شیعە هەڵوێستی خۆی لەبارەی هەڵبژاردنەکانی ئەمریکاوە ئاشکرا دەکات و پشتڕاستی دەکاتەوە کە خەڵکێکی زۆر هیوای خۆیان لەسەر هەڵبژاردنی ئەمریکا هەڵدەچنن و ئاماژە بۆ ئەوە دەکات شەرمەزارییە  بۆ موسڵمانێک یان عەرەبێک هیواکانی لەسەر کەسێکی "پیر" یان "شێت" هەڵبچنێت.

 

وێنە گەورەکە: بڕیاروایە ئەمڕۆ سێشەممە 5ی نۆڤەبەر هەڵبژاردنی سەرۆکێکی نوێ بۆ ئەمریکا لە 50 ویلایەت بەڕێوەبچێت، هەریەک لە کامالا هاریس، کاندیدی دیموکراتەکان و دۆناڵد ترەمپ، کاندیدی کۆمارییەکان لە کێبڕکێیەکی تووندان، بە گوێرەی زۆربەی ڕاپرسییەکان  ڕێژەی دەنگەکانیان لە یەک نزیکە.

 

پەیامی فەرمی: موقتەدا سەدر، ڕێبەری ڕەوتی نیشتمانی شیعە لە پەیامێکی لەبارەی هەڵبژاردنەکانی ئەمریکا لە پەڕەی فەرمی خۆی لە تۆڕی ئێکس بڵاوکردووەتەوە دەڵێت: زۆرێک هیواکانیان لەسەر هەڵبژاردنەکانی ئەمریکا هەڵدەچنن کە تێیدا دیموکرات و کۆمارییەکان کێبڕکێ دەکەن بۆ چارەسەرکردنی کێشەکانیان و گەیشتن بە خواستە کەسیی یان گشتییەکانیان بۆ پڕکردنەوەی ئەو بۆشاییەی کە گەلانی جیهانی سێیەم کەوتوونەتە ناویەوە.

 

لە هەمان کاتدا: بە گوتەی سەدر، بۆ هەموو کەسێک ڕوونە زۆربەی ئەوەی جیهانی سێیەم بە گشتی یان ڕۆژهەڵاتی ناوەڕاست بە تایبەتی بەدەستیەوە دەناڵێنێت، بەهۆی ئەو سیاسەتانەیە کە حکومەتەکانی ڕۆژئاوا بە گشتی و حکومەتە یەک لە دوای یەکەکانی ئەمریکا بە تایبەتی پەیڕەوی لێدەکەن.

 

بەتەنیشت ئەم بابەتەوە: ڕێبەری ڕەوتی نیشتمانیی شیعە ئاماژە بۆ ئەوەش دەکات ئەگەر ئەمریکا بیەوێت خۆی وەک فریادڕەسێک پیشان بدات، ئەوا واقیع و ڕاستییەکان تەواو پێچەوانەن، بەو پێیەی کاندیدەکانی هەڵبژاردنی ئەمریکا و تەنانەت ئەو سەرۆکانەی پێش ئەوانیش، گەورەترین لایەنگری ئیسرائیل بوونە، ئەمەش گەورەترین دووڕیان لە ڕۆژهەڵاتی ناوەڕاستدا دەردەخات.