هەزاران دەرچووی زانکۆ و پەیمانگەکان بەشێوەی کاتی دادەمەزرێن

ئاڤا نیوز 

 

بۆ بەڕێوەبردنی سەرژمێری لە پارێزگاکانی هەرێمی کوردستان، وەزارەتی پلاندانان دەرچووانی زانکۆ و پەیمانگەکان بەشێوەی گرێبەست و کاتی دادەمەزرێنێت و بۆ هەر مانگێک 250 هەزار دیناریان پێدەدات.

 

وێنە گەورەکە: سەرژمێری گشتی لە هەرێمی کوردستان و عێراق 20-11ـی ئەمساڵ دەستپێدەکات، بەڕێوەبردنی پرۆسەکە پێویستی بە هەزاران کارمەندە، دەرچووانی زانکۆ و پەیمانگەکانی هەرێمی کوردستان بە شێوازی پڕکردنەوەی فۆرم دادەمەزرێنرێن و بە ڕەچاوکردنی مەرجەکان دابەشی سەر پارێزگاکان دەکرێن.

 

بڵاوکراوەی فەرمی: وەزارەتی پلاندانان ئەو مەرجانەی بڵاوکردووەتەوە کە ئەو دەرچووانە دەبێت هەیانبێت، مەرجە لە هیچ دامودەزگایەک دانەمەزرابن و ئەو مەرجانە بیانگرێتەوە کە دانراون.

 

مەرجەکان: پێشکەشکار دەبێت لە شوێنی نیشتەجێبوونی خۆی داواکاری پێشکەش بکات بەپێی قەزا - ناحیە - گەڕەک یان گوند، تەمەنی پێشکەشکار لە نێوان ( 20 بۆ 45 ) ساڵدا بێت، بڕی  250 هەزار دینار بۆ هەر مانگێک وەک شایستەی دارایی دیاریکراوە، لە ئەگەری پچڕاندنی لە کارکردن بۆ ماوەی سێ ڕۆژ لەسەر یەک، ئەوا مووچەی ئەو مانگە وەرناگرێت و گرێبەستەکە هەڵدەوەشێتەوە. هەروەها مەرجە پێشکەشکار شارەزایی هەبێت لە بواری ئامێرە ئەلیکترۆنییەکاندا (تابلێت)، بۆ هەر ڕۆژێک لەبری نانخواردن 10 هەزار دیناری پێدەدرێت.

 

لە ڕێگەى ئەم بەستەرەوە داواکارى پێشکەش بکەن: https://census-job-krd.com/