سەرکردەیەکی حەماس داوایەک ئاراستەی ترەمپ دەکات

ئاڤا نیوز

 

دوای ڕاگەیاندنی ئەنجامە بەراییەکانی هەڵبژاردنی سەرۆکایەتیی ئەمریکا، سەرکردەیەکی باڵای بزووتنەوەی مقاوەمەی ئیسلامی "حەماس" داوا لە دۆناڵد ترەمپ سەرۆکی هەڵبژێردراوی ئەمریکا دەکات سوود لە هەڵەکانی جۆ بایدن وەربگرێت.

 

لێدوانی فەرمی: سامی ئەبو زوهری، سەرکردەی باڵای حەماس لە لێدوانێکدا بە ڕۆیتەرزی گوتووە: سەرکەوتنی دۆناڵد ترەمپ کاندیدی کۆمارییەکان بۆ هەڵبژاردنەکانی سەرۆکایەتی ئەمریکا دەیخاتە بەردەم تاقیکردنەوەیەک بۆ تەرجەمەکردنی لێدوانەکانی کە دەڵێ توانای ئەوەی هەیە لە ماوەی چەند کاتژمێرێکدا جەنگ ڕابگرێت".

 

‏سەرکردەکەی حەماس ئەوەشی گوتووە: "لەدەستدانی ئەو پۆستە لەلایەن دیموکراتەکانەوە باجی سروشتی هەڵوێستە تاوانکارییەکانی سەرکردایەتییەکەیانە بەرامبەر غەززە"، داوا لە ترەمپ دەکات "سوود لە هەڵەکانی" سەرۆک جۆ بایدن وەربگرێت.

 

لەلایەکی دیکە: باسم نەعیم، ئەندامی مەکتەبی سیاسی حەماس لە کەرتی غەززە، جەختی لەوە کردووتەوە کە واشنتن دەبێت "پاڵپشتی کوێرانە" بۆ ئیسرائیل ڕابگرێت و کۆتایی بە شەڕی کەرتی غەززە بهێنێت، ئەمەش دوای ئەوەی دۆناڵد ترەمپی کۆماریخواز سەرکەوتنی خۆی لە کۆشکی سپی ڕاگەیاند.

 

باکگراوند: ڕۆژی 6-11-2024 ئەنجامە بەراییەکانی هەڵبژاردنی ئەنجوومەنی پیران و سەرۆکایەتیی ئەمریکا  ئاشکرا کرا و دۆناڵد ترەمپ لە ویلایەتی فلۆریداوە وتاری سەرکەوتنی پێشکەش کرد و خۆی وەکو 47ـەمین سەرۆکی ئەمریکا ناساند.