حکومەتی عێراق هەڕەشەی داخستنی زانکۆ تایبەتەکانی هەرێمی کوردستان دەکات

ئاڤا نیوز

حکومەتی عێراق هەڕەشە دەکات ئەگەر وەزارەتی خوێندنی باڵای هەرێمی کوردستان دان بە زانکۆکانی کیتاب و قەڵەم لە کەرکووک نەنێت،  مۆڵەتی زانکۆ تایبەتەکانی هەرێمی کوردستان هەڵدەوەشێننەوە.

چیرۆکی سەرەکی: زانكۆکانی كیتاب و قەڵەم دوو زانکۆن دەکەونە سنووری پارێزگای کەرکووک، دەیان دەرچووی ئەم دوو زانكۆیە بە نوێنەرایەتیی سەرجەم دەرچووانی دیکە نووسراوێكیان ئاراستەی ئاڤا میدیا كردووە، داوا دەكەن وەك سەرجەم ئەو بابەتانەی ئاڤا میدیا لەو ماوە كورتەی كاركردنیدا بەدواداچوونی بۆ كردوون و چارەسەری كردوون، ئاواش بەدواداچوون بۆ گرفتی دانپێدانەنانی بڕوانامەكانی ئەوان بكات، ئاڤاش بۆ ئەم بابەتە قسەی لەگەڵ پێنج سەرچاوەی جیاواز کرد.

ئەوەی پێویستە بیزانیت: زانکۆکانی كیتاب و قەڵەم مۆڵەتپێدراوی وەزارەتی خوێندنی باڵای عێراقن و ساڵانە سەدان كەس پەیوەندیی پێیانەوە دەكەن و سەدانی دیكەش دەردەچن و بڕوانامە بەدەستدێنن، ئێستا هەزاران كەس كە دانیشتووی هەرێمی كوردستانن دەرچووی هەردوو زانكۆکەن، بەڵام گرفتی ئەو دەرچووانە ئەوەیە وەزارەتی خوێندنی باڵای حكومەتی هەرێمی كوردستانیش دان بە بڕوانامەكانیاندا نانێت، بۆیە لە دامودەزگاكان هیچ ئیمتیازێكی بڕوانامە نایانگرێتەوە.

هۆکارە زانراوەکان: ئاڤا لە سەرچاوەیەكی باڵای وەزارەتی خوێندنی باڵای هەرێمی كوردستان زانیاری دەستکەوتووە: سێ هۆكاری سەرەكی هەن بۆیە تاوەكو ئێستا دان بە بڕوانامەی ئەو دوو زانكۆیە نەنراوە:

یەکەم: ئەو دوو زانكۆیە پابەندی ئەو ڕێسا و ڕێنماییە نین کە زانکۆکانی هەرێمی كوردستان پەیڕەوی دەکەن.

دووەم: دەوامكردنی قوتابی لەو زانكۆیانە زۆر لاوازە و قوتابی بە ئارەزووی خۆی دەوام دەكات و لە وانەكان ئامادە دەبێت.

سێیەم: قوتابی لە بەشە بەرزەكانی خوێندن بە نمرەیەكی زۆر كەم لەو زانكۆیانە وەردەگیرێت.

مەترسییە پێشبینیکراوەکان: ترسەکە ئەوەیە ئەگەر وەزارەتی خوێندنی باڵای هەرێمی كوردستان دان بە بڕوانامەی ئەو زانكۆیانەدا بنێت،  هیچ قوتابییەک لە زانكۆ تایبەتەكانی هەرێمی كوردستان نامێنێت و هەمووی دەچنە ئەو دوو زانكۆیە و هاوشێوەكانیان، چونكە كەمترین ڕێوشوێن بەرامبەر قوتابی دەگیرێتە بەر، هیچ قوتابییەك ناكەوێت و بە نەهاتووش هەژمار ناكرێت.

کاریگەری و لێکەوتەکان: هەر بەپێی بەدواداچوونی ئاڤا نیوز، وەزارەتی خوێندنی باڵای عێراق چەند جارێك بە نووسراوی فەرمی و بە زارەكی هەڕەشەی لە وەزارەتی خوێندنی باڵای هەرێمی كوردستان كردووە، ئەگەر بێت و لە هەرێمی كوردستان دان بە بڕوانامەی ئەو زانكۆیانەدا نەنرێت، ئەوا عێراقیش مۆڵەت و دانپێدانانی سەرجەم زانكۆ تایبەتەكانی هەرێمی كوردستان هەڵدەوەشێنێتەوە و دان بە هیچ بڕوانامایەكی ئەو زانكۆیانەدا نانێت، بەڵام سەرچاوەکەی ئاڤا دەڵێت، عێراق ناتوانێت ئەو کارە بکات.