دەرفەتێكی نموونەیی بۆ کارخوازان؛ پۆرتاڵی هەلی کار ڕادەگەیێنرێت

ئاڤا نیوز

حكومەتی هەرێمی كوردستان خزمەتگوزارییەك بەردەست دەکات بۆ ئەوەی کارخوازان بەئاسانی هەلی کار بدۆزنەوە.

چیرۆكی سەرەكی: وەزارەتی كار و كاروباری كۆمەڵایەتی، بەمەبەستی ئاسانكاری بۆ دۆزینەوەی كار، پۆرتاڵی (هەلی كار)ـی ڕاگەیاند، داواش لە كارخوازان دەكات بۆ دۆزینەوەی دەرفەتی كار، هەژماری تایبەت بە خۆیان لەو پۆرتاڵە بكەنەوە.

ڕاگەیێنراوی فەرمی: وەزارەتی كار و كاروباری كۆمەڵایەتی لە پێگەی فەرمی خۆی بڵاوی كردووەتەوە، كارخوازان دەتوانن لەڕێگەی پۆرتاڵی هەلی كار، بەو هەلی كارانە ئاشنابن كە لەلایەن خاوەنكارانەوە دادەنرێن.

ئەوەی پێویستە بیزانیت: پۆرتاڵی هەلی كار لە ڕۆژی یەكشممەوە 10-11-2024 كارا دەبێت و هاووڵاتیان دەتوانن دوای بەردەستبوونی، سەردانی پۆرتاڵەكە بكەن و هەژمارێكی تایبەت بە خۆیان بەخۆڕایی دروست بكەن.

ئەوەش بزانە: كارخوازان دەتوانن هەمان ڕۆژ سەردانی پێشانگەی نێودەوڵەتیی هەولێر لەنێو پاركی سامی عەبدولڕەحمان بكەن، بەمەبەستی ڕاوێژكردن بە تیمەكانی هەژماری هەلی كار و بەخۆڕایی لە دروستكردنی هەژمارێكی تایبەت سوودمەند بن.