خولێکی جیاواز؛ ئافرەتانی دانەمەزراو فێری لێنانی خواردنی کوردەواری دەکرێن

ئاڤا نیوز

لە ئاکرێ خولێکی پیشەسازیی خۆراک بۆ ئافرەتانی دەرچووی دانەمەزراوی بەشەکانی کشتوکاڵ دەکرێتەوە و فێری لێنانی خواردنی کوردەواری دەکرێن. بڕیارە هەمان خول لە سەرجەم ناوچەکانی کوردستان بکرێتەوە.

چیرۆکی سەرەکی:  وەزارەتی کشتوکاڵ و سەرچاوەکانی ئاو، بە هەماهەنگی ڕێکخراوی (USAID) و ڕێکخراوی(UNDP)، لە ئاکرێ خولێکی پیشەسازیی خۆراکی بۆ ژمارەیەک دەرچووی دانەمەزراوی بەشەکانی کشتوکاڵ کردووەتەوە.

لێدوانی فەرمی: فازیل مستەفا، بەڕێوەبەری کشتوکاڵی ئاکرێ بە ئاڤا نیوزی ڕاگەیاند، خولەکە تەنها بۆ ئافرەتانە و حەوت ڕۆژ بەردەوام دەبێت، بەشداربووان فێری لێنانی خواردنە کوردەوارییەکان دەکرێن.

بۆچی گرنگە: خولەکە پەرە بە لێهاتوویی و دەستڕەنگینی دەرچووانی دانەمەزراو دەدات، بە ئامانجی فێربوونی پیشەی نوێ و کرانەوەی دەرگایەک بۆ دامەزراندنی پڕۆژەی بچووک لە داهاتوودا.