ساڵانە 500 ملیار دینار بۆ دابینکردنی ئاوی پاکی کوردستان خەرج دەکرێت

ئاڤا دیجیتاڵ 

 

دابینکردنی ئاوی خواردنەوە، بەپێی پێوەرە تەندروستییە نێودەوڵەتییەکان یەکێک لە ئەرکەکانی حکومەتی هەرێمی کوردستانە و ڕۆژانە سێ ملیۆن مەتر سێجا ئاوی پاک بەرهەم دەهێنێت.

 

چۆن کار دەکەن؟ تیمەکانی تاقیگەی ناوەندیی ئاو، ڕۆژانە نزیکەی 50 نموونەی ئاو لە پرۆژەی ئیفراز و بیرەکان وەردەگرن و لە تاقیگەدا پشکنینی کیمیایی و مایکرۆبایلۆجی بۆ ئاوەکە دەکەن، لە پاش دڵنیابوونەوە لە دروستییەکەی ڕێی پێ دەدرێت بگاتە هاووڵاتییان، گەر نا چارەسەری زانستی بۆ دەکرێت، لەم ڕووەوە ئەو ئاوەی دەگاتە ماڵان 100% شیاوە بۆ خواردنەوە.

 

ئاری ئەحمەد، بەڕێوەبەری گشتیی ئاو و ئاوەڕۆکانی هەرێمی کوردستان، بۆ ئاڤا میدیا گوتی، کۆی گشتی خەرجی بەرهەمهێنان و دابەشکردنی ئاو لە ماوەی یەک ساڵدا 510 ملیار دینارە.

 

چ ئاوێک بۆ خواردنەوە دەشێت؟

 

شەرمین رەحمان بایز، سەرۆکی بەشی کۆنترۆڵی جۆری بەڕێوەبەرایەتی گشتیی ئاو و ئاوەڕۆکانی هەرێمی کوردستان بە ئاڤا میدیای راگەیاند، لە هەرێمی کوردستان 14 تاقیگەی مایکرۆ بایۆلۆجی، کیمیایی و بەکتریالۆجیمان هەیە و رۆژانە سامپڵی ئاو لە ناوچە جیاوازەکان وەردەگرن، بۆ ئەوەی بزانن تا چەند شیاوی خاوردنەوەن و ئاوی چ ناوچەیەکیش پاکە و رێژەی پاکییەکەی سەدا چەندە. 

 

ئەوەشی خستەڕوو کە بەگوێرەی بەرپرسانی تاقیگەی ناوەندیی ئاو لە هەولێر، هەموو نموونەکانی ئاو دەخرێنە ژێر پشکنینەوە و بە پێوەری جیهانی ڕێیان پێدەدرێت بگەنە ماڵان، بۆیە 100% ئەو ئاوەی دەگاتە ماڵان، شیاو و تەندروستە و بۆ خواردنەوە دەشێت.

 

"ئەمە تەنیا بۆ هەولێر راست نییە، بەڵکو زۆربەی شارەکانی دیکەی هەرێمی کوردستان ئاوی پاکیان هەیە و شیاوی خواردنەوەن" شەرمین لە درێژەی قسەکانیدا وای گوت.