کۆمیسیۆن وەڵامی ژمارەیەک تانە ڕەوانەی دەستەی دادوەریی هەڵبژاردن دەکات

ئاڤا نیوز

 

کۆمیسیۆنی باڵای سەربەخۆی هەڵبژاردنەکانی عێراق وەڵامی ژمارەیەک تانەی لە ئەنجامی هەڵبژاردنی پەرلەمانی کوردستانی ڕەوانەی دەستەی دادوەریی هەڵبژاردن کردووە و کار لەسەر وەڵامی تانەکانی دیکەش دەکات.

 

وێنە گەوەرەکە: دواى ڕاگەیاندنی ئەنجامی فەرمیی هەڵبژاردنی خولی شەشەمی پەرلەمانی کوردستان، 41 تانە لە ئەنجامی هەڵبژاردن لەلایەن لایەنە سیاسی و کاندیدەکانەوە پێشکەش بە کۆمیسیۆن کرا، بە جۆرێک لە سلێمانی 25 تانە، هەولێر 12، سێ تانە لە دهۆک و لە هەڵەبجەش یەک تانە لە ئەنجامی هەڵبژاردنەکان دران.

 

لێدوانی فەرمی: جومانە غەلای، گوتەبێژی کۆمیسیۆنی باڵای هەڵبژاردنەکانی عێراق ڕایگەیاند: "لە کۆی 41 تانە کە لەسەر ئەنجامی هەڵبژاردنەکان پێشکەشکرابوون، کۆمیسیۆن وەڵامی 28 تانەی بۆ دەستەی دادوەریی هەڵبژاردن ناردووە".

 

زانیاریی زیاتر: بە گوتەی غەلای کارکردن لەسەر ئەو تانانەی ماون، بەردەوامە و دوای ئامادەکردنی وەڵامەکانیان ئەوانیش ڕەوانەی دەستەی دادوەریی دەکرێن.

 

ئەوەی پێویستە بیزانیت: پێویستە کۆمیسیۆنی هەڵبژاردنەکان لەماوەی حەوت ڕۆژی کارکردندا، وەڵامی تانەکان ئامادە بکات و ڕەوانەی دەستەی دادوەرییان بکات. دوای یەکلاکردنەوەی تانەکانیش، کۆمیسیۆن ئەنجامە فەرمییەکانی هەڵبژاردنی پەرلەمانی کوردستان پەسەند دەکات.