نوێترین زانیاری لەبارەی مووچەی مانگی 10؛ زیاتر لە 500 ملیار دینار دەنێردرێت

ئاڤا نیوز

 

بڕیارە لە چەند ڕۆژی داهاتوودا گوژمەی یەکەمی مووچەی مانگی 10 بنێردرێت، ڕاوێژکاری سوودانیش دەڵێت مووچەی مانگەکانی 11 و 12 دەنێردرێت و گرفتی بۆ دروست نابێت.

چیرۆکی سەرەکی: چەند ڕۆژێکە شاندێکی تەکنیکی وەزارەتی دارایی و ئابووریی حکومەتی هەرێمی کوردستان بۆ پرسی مووچە لە بەغدایە، بڕیارە لە چەند ڕۆژی داهاتوودا زیاتر لە 500 ملیار دینار وەکو گوژمەی یەکەمی مووچەی مانگی 10 بنێرێت.

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤا میدیای ڕاگەیاند، دوای گوژمەی یەکەم کۆتایی ئەم هەفتەیە یان سەرەتای هەفتەی داهاتوو گوژمەی دووەم و تەواوی مووچەی مانگی 10 دەنێردرێت. حکومەتی هەرێمی کوردستان بۆ مووچەی ئەم مانگە پێویستی بە 996 ملیار دینارە.

زانیاریی تایبەت: شاندی هەرێمی کوردستان  لە کۆڤان تەحسین، بەرێوەبەری گشتیی ژمێرکاری و ڕێباز عەباس، ڕاوێژکاری وەزارەتی دارایی پێکهاتووە، لەگەڵ دیوانی چاودێری لە وەزارەتی دارایی کۆبوونەتەوە سەبارەت بە چارەسەرکردنی کێشەکانی تایبەت بە مووچە،  گفتوگۆکانیش بەردەوامن.

ئەوەی پێویستە بیزانیت: کێشەیەک لە بەغدا هەیە و حکومەتی هەرێمی کوردستان لە پشکی بودجە پارەی پێویستی بۆ مووچە نەماوە، ئاڤا نیوز زانیویەتی ئەم مانگە 300 ملیار دینار کورتهێنان دروست دەبێت لەگەڵ مووچەی مانگەکانی 11 و 12، ئەمە بە گواستنەوەی پارە لە پشکی خەرجی بەکاربردن بۆ پشکی مووچە چارەسەر دەبێت.

زانیاریی زیاتر: سەرچاوەیەک لە وەزارەتی دارایی و ئابووری بە ئاڤا نیوزی گوت: بۆ چارەسەرکردنی ئەم پرسە سبەی ئێوارە شاندێکی دیکە دەچێتە بەغدا و داوا دەکەن پرۆسەی گواستنەوە پارە (موناقەلە) بەخێرایی بکرێت کە لە دەسەڵاتی تەیف سامی، وەزیری داراییە.

خاڵی ئەرێنی: عائید هیلالی، ڕاوێژکاری ڕاگەیاندنی سەرۆکوەزیرانی عێراق بە ئاڤا میدیایی ڕاگەیاند: ئێستا ڕێککەوتن لە نێوان حکومەتی هەرێمی کوردستان و حکومەتی فیدڕال هەیە لەسەر ناردنی مووچەی فەرمانبەران، پێموانییە هیچ کێشەیەک بۆ مووچەی مانگەکانی 11 و 12 دروست بێت و ناردنی مووچە بەردەوام دەبێت.