کێشەیەک بۆ مووچە دروست دەبێت و شاندێک بۆ چارەرسەرکردنی دەچێتە بەغدا

ئاڤا نیوز

 

وردبینی لە لیستی مووچەی مانگی 10 ـی مووچەخۆرانی هەرێمی کوردستان بەردەوامە، کێشەیەکی نوێ بۆ مووچەی مانگەکانی 10، 11 و 12 دروست بووە، شاندێک لە بەغدایە و شاندێکی دیکە لە دوو ڕۆژی داهاتوو دەچێتە بەغدا بۆ چارەسەرکردنی.

 

وێنە گەورەکە: هەرێمی کوردستان بۆ مووچەی مانگی 10 بڕی 996 ملیار دیناری پێویستە و بڕیارە ئەم هەفتەیە زیاتر لە 500 ملیار دینار بنێردرێت، بەڵام بڕی 300  ملیار دینار کورتهێنان هەیە و وەزارەتی دارایی عێراق دەڵێت پارەی پێویست لە پشکی مووچە لە بودجەی ساڵی 2024 نەماوە، هەمان کێشەی مووچەی مانگەکانی 11 و 12 دروست دەبێت. هەرێمی کوردستان تەواوی پارەی پشکی مووچەی لە بودجە بۆ مووچەی مانگەکانی ڕابردوو خەرج کردووە.

 

چارەسەر: وەزارەتی دارایی و ئابووریی هەرێمی کوردستان لە هەوڵدایە لە ڕێگەی گواستنەوەی پارە لە پشکی خەرجی بەکاربردن بۆ پشکی مووچە کێشەکە چارەسەر بکات، ئەمەش دەسەڵاتی تەیف سامی، وەزیری داراییە.

 

لێدوانی فەرمی: سەرچاوەیەک لە وەزارەتی دارایی و ئابووریی حکومەتی هەرێمی کوردستان بە ئاڤا نیوزی گوت، "داواکاریمان بۆ گواستنەوەی پارە پێشکەش کردووە و چاوەڕێین جێبەجێی بکەن، بۆ ئەوەی هیچ کورتهێنانێک دروست نەبێت، ئەگەر وەزارەتی دارایی عێراق گواستنەوەکە نەکات کێشە دروست دەبێت، چونکە 300 ملیار دینار کورتهێنانمان دەبێت."

 

خاڵی ئەرێنی: عائید هیلالی، ڕاوێژکاری ڕاگەیاندنی سەرۆکوەزیرانی عێراق ئەمڕۆ شەممە بە ئاڤا میدیای ڕاگەیاند: ئێستا ڕێککەوتن لە نێوان حکومەتی هەرێمی کوردستان و حکومەتی فیدرال هەیە لەسەر ناردنی مووچەی فەرمانبەران، پێموانییە هیچ کێشەیەک بۆ مووچەی مانگەکانی 11 و 12 دروست بێت و ناردنی مووچە بەردەوام دەبێت.