لە کۆیە بەهۆی دەستڕێژی گوللە ئۆتۆمبێلێک دەتەقێتەوە و ماڵێک دەسووتێت

ئاڤا نیوز

 

دوای ئەوەی ئەمشەو تەقە لە ماڵێک لە قەزای کۆیە دەکرێت، فیشەک بەر تەنکی بەنزینی ئۆتۆمبێلەکەیان دەکەوێت و دەتەقێتەوە، کەسێکیش گیان لەدەست دەدات.

 

ڕاگەیێنراوی فەرمی: گۆران ئەحمەد بەڕێوەبەری بەرگریی شارستانی کۆیە ڕایگەیاند، کەمێک پێش ئێستا کەسێک تەقەی لە ماڵێک کردووە و گوللە بەر تەنکی بەنزینی ئۆتۆمبێلی ماڵەکە کەوتووە و تەقیوەتەوە، بەوهۆیەشەوە ئۆتۆمبێل و ماڵەکەش سووتاون.

 

ئاماژەی بەوەش کردووە، ئێستا ئاگرەکە کۆنتڕۆڵ کراوە، بەڵام کەسێک لە ڕووداوەکەدا گیانی لەدەستداوە کە پیاوە و تەمەنی نزیکەی 70 ساڵە، "تا ئێستا هۆکاری ڕووداوەکە بە وردی نەزانراوە، بەڵام پێدەچێت بەهۆی کێشەی کۆمەڵایەتییەوە بووبێت".

 

لێدوانی فەرمی: حاکم تاریق، قایمقامی قەزای کۆیە، بە ئاڤا نیوزی گوت: کاتژمێرێک پێش ئێستا کەسێک تەقەی لە باپیری خۆی کردووە و کوشتوویەتی، دواتر ئۆتۆمبێل و ماڵەکەی سوتاندووە و هەڵهاتووە و تاوەکو ئێستاش دەستگیر نەکراوە.

 

قایمقامی کۆیە دەڵێت: ڕووداوەکە بەهۆی میراتەوە بووە، بکوژەکە کچەزای کوژراوەکەیە، ئەو کەسەی کوژراوە تەمەنی 74 ساڵە.

 

زانیاریی زیاتر: پۆلیس و ئاسایش لە شوێنی ڕووداوەکەن و سەرقاڵی لێکۆڵینەوەن، توانراوە ئاگرەکەش کۆنترۆڵ بکرێت.