تورکیا ئۆتۆمبێلێکی چەکدارانی پەکەکە لە شنگال دەکاتە ئامانج

ئاڤا نیوز

 

هێزەکانی سوپای تورکیا لە ڕێگەی فڕۆکەی بێفڕۆکەوانەوە ئۆتۆمبێلێکی چەکدارانی پەکەکە لە چیای شنگال دەکەنە ئامانج و تاوەکو ئێستاش زیانەکانی ئەو هێرشە دیار نین.

 

وێنە گەورەکە: هێرشەکانی سوپای تورکیا بۆسەر بەرپرسان و چەکدارانی پەکەکە لە ناوچە سنوورییەکانی هەرێمی کوردستان و ئەو شوێنانەی چەکدارانی پەکەکەی لێ نیشتەجێیە بەردەوامە، لە ماوەی 24 کاتژمێری ڕابردوو ئەمە دووەم هێرشی سوپای تورکیایە بۆسەر چەکدارانی پەکەکە لە سنووی پارێزگای دهۆک و نەینەوا.

 

زانیاریی بەدەستهاتوو: سەرچاوەیەکی ئەمنی لە پارێزگای نەینەوا ڕایگەیاند: دوای نیوەڕۆی ڕۆژی یەکشەممە 10-11-2024 فڕۆکەی بێفڕۆکەوانی سوپای تورکیا ئۆتۆمبێلێکی چەکدارانی پەکەکەی لە چیای شنگال کردە ئامانج.

 

زانیاریی زیاتر: بە گوتەی ئەو سەرچاوەیە هێشتا زیانەکانی ئەو هێرشە دیار نین کە چەند کەس کوژراون یان برینداربوونە.

 

لەلایەکی دیکەوە: دژەتیرۆری کوردستان ڕایگەیاند، درەنگانی شەوی ڕابردوو فڕۆکەی بێفڕۆکەوانی سوپای تورکیا ئۆتۆمبێلێکی چەکدارانی پەکەکەی لە گوندی کلیل لە سنووری ناحیەی چەمانکێی سەر بە قەزای ئامێدی لە پارێزگای دهۆک کردە ئامانج و بەهۆیەوە بەپرسێک و دوو چەکداری پەکەکە کوژران.