کاکە حەمە بە شۆفڵ و حەفارە خانووی عەبدوڵڵای برای لە گوڵەخانە دەڕووخێنێت

ئاڤا نیوز

محەممەد حاجی مەحموود، سکرتێری پارتی سۆسیال دیموکراتی کوردستان بە شۆفڵ و حەفارە خانووی عەبدوڵڵای برای لە گوڵەخانە دەڕووخێنێت.

وێنە گەورەکە: ماوەی 11 مانگە ناکۆکی کەوتووەتە نێوان محەممەد حاجی مەحموود و عەبدوڵڵای برای کە ئێستا وەزیری شەهیدان و ئەنفالکراوانە و پێشتر جێگری بوو. ناکۆکییەکەیان تەنانەت ڕووبەڕووبوونەوەی سەربازی و کوژراو و برینداری لێکەوتەوە و لە هەڵبژاردنیش بە جیا بەشدارییان کرد.

لە پەیامنێرەوە: ئاراس ڕەفیق، پەیامنێری ئاڤا میدیا لە شارەزوور ڕایگەیاند،  دوای ڕادەستکردنی خانووی عەبدوڵڵا حاجی مەحموود لەلایەن ئاسایشەوە بە محەممەدی برای لە گوڵەخانە، بە شۆفڵ و حەفارە ڕووخێنراوە.

زانیاریی زیاتر: محەممەد حاجی مەحموود خۆی سەرپەرشتی پرۆسەکە دەکات و بڕیار دراوە  خانووێکی دیکە کە هی لیوا سەڵاح عەلی، زاوای عەبدوڵڵا حاجی مەحموودە لە هەمان شوێن بڕووخێنرێت کە پێشتر بەرپرسی هێزەکانی سۆسیالیست بوو بەڵام ئێستا پشتگیری خەزووری دەکات.

باکگراوند: دوای شەڕەکەی گوڵەخانە کە شەوی 04-04-2024 لەنێوان هێزەکانی سەر بە عەبدوڵڵای حاجی مەحموود و پاسەوانەکانی محەممەدی برای ڕووی دا، خانووی عەبدوڵڵا لەلایەن ئاسایشەوە چاودێری دەکرا، دوێنێش ڕادەستی محەممەدی حاجی مەحموود کرا.