ئەو كەسانەی ناویان لە تیروپشكی شووقە و زەوی دەردەچێت دەبێت یەكێكی ڕەتكەنەوە

ئاڤا نیوز

 

حكومەتی هەرێمی كوردستان نۆ هەزار و چوار یەكە بەسەر كەسانی كەمدەرامەت و كرێچی و فەرمانبەرانبەرانی سوودمەندنەبوو دابەش دەكات.

 

وێنە گەورەكە: لە ماوەی ڕابردوو زیاتر لە 26 هەزار كەس لە هەر چوار پارێزگاكەی هەرێمی كوردستان بە ئۆنڵاین فۆرمی وەرگرتنی شووقەیان لە وەزارەتی ئاوەدانكردنەوە و نیشتەجێكردن پڕكردووەتەوە و دوای وردبینیكردن، ڕەزامەندی لەسەر ناوی 23 هەزار كەس دراوە بۆ ئەوەی بخرێنە تیروپشكەوە.

 

لێدوانی فەرمی: توانا بەشیر، بەڕێوەبەری گشتیی دیوانی وەزارەتی ئاوەدانكردنەوە بە ئاڤا نیوزی ڕاگەیاند: ئەو شووقانە 50%یان بۆ فەرمانبەرانی سوودمەندنەبوو و كەمدەرامەتە و 50%یش بۆ كەسانی دانەمەزراوە و كرێچییەكانیش دەگرێتەوە، ئێستا ناوەكان نێردراون بۆ هەر چوار پارێزگا بۆ ئەوەی ئەو كەسانەی سوودمەند نەبوونە و خاڵ و مەرجەكانیان تێدایە دواتر ناوەكانمان بۆ دەنێرنەوە.

 

زانیاریی زیاتر: ژمارەی یەكەكانی نیشتەجێبوون نۆ هەزار شووقەیە و 3%ی بۆ كەسانی خاوەن پێداویستیی تایبەت دەبێت.

 

گۆشەیەكی دیكە: پرۆسەی وردبینیكردنی ناوی ئەو كەسانە لەكاتێكدایە كە پرۆسەی دابەشكردنی زەوییش بەسەر فەرمانبەران لەلایەن وەزارەتی شارەوانییەوە بەردەوامە و بەهەمان شێوە ئەو ناوانەی كە لە تیروپشك دەردەچن دەنێردرێن بۆ پارێزگاكان بۆ ئەوەی لە سوودمەندنەبوونیان دڵنیا ببنەوە، كەسانێك هەن فۆرمی شووقە و زەوییان پڕكردووەتەوە و ئەگەری ئەوە هەیە ناوی لە هەردوو پرۆسەكە دەربچێت.

 

لەلایەكی دیكەوە: بەڕێوەبەری دیوانی وەزارەتی ئاوەدانكردنەوە ڕایگەیاند: دوای ئەوەی تیروپشك دەكرێت، ئێمە ناوەكان بۆ وەزارەتی شارەوانی دەنێرین بۆ ئەوەی دڵنیا بین لەوەی كە دابەشكردنی زەوی سوودمەند نەبووە و ناوی لە تیروپشكی زەوی دەرنەچووە، كەسەكە تەنیا لە یەكێكیان سوودمەند دەبێت.